Zanin dar 12:30-ah Manchester Derby

Manchester City-in an khelh hmabak match liah hnehna an chan vek chuan Premier league nomawi an chawi nawn dawn a, Liverpool beiseina chu Pep Guardiola hote hi chesual se tih a ni. Zanin dar 12:30 hian Old Trafford-ah Manchester Derby khelh a ni dawn a, Jurgen Klopp-a hoten an hmelma Manchester United an ṭan ang.

Liverpool midfielder James Milner chuan, "A vawi khat nan Manchester United ka ṭan dawn," tiin a sawi a, inkhel erawh tha a heh avangin en a tum lo. Reds hi 1989-90 hnuah English champion an la ni leh lo a, tun season-ah match 35 khelhah point 88 hmuin hmahruaitu ni mek mah se an hnuaia awm City hian point 86 hmuin match khatin an khel tlem zawk.

Innghahna tlak?
Manchester United hian March thlatira Paris Saint-Germain an hneh hnuah match riat khel leh tawhin match ruk an chak lo a, FA Cup leh Champions League beiseina a tawp. League match hnuhnung pangaah vawi thum an chak loh avangin parukna an ni mek.

Ole Gunnar Solskjaer hote hian match hnung berah Everton chu Goodison Park-ah 4-0 zetin an hneh lo a, khawthlang media te chuan dressing room-ah player thinrim an intibuai tih thu thlengin an ziak. Thuthang tam tak zingah Champions League an khelh phak loh chuan Paul Pogba leh David de Gea te an chhuak dawn tih te chu thil ni thei tak a ni ang.

United an talbuai avangin Liverpool tan innghahna tlak niin an lang lo a, amaherawhchu an khelhna hmun hi Old Trafford a nih avangin Man City hi chak chianga dah a rem lo. Solskjaer hote hi an mualah league match 13 chu a zawnin an tlawm tawh lo!

Solskjaer thukhawchang
United boss Solskjaer chuan, "United-ah buaina a awm maw? Match khat emaw match hnih kan chak loh chuan hetiang hi chu a thleng tur a ni," tiin ṭha zawka khelh duh vang a nih thu a sawi a, Everton an hneh loh zawhah buaina hranpa a awm loh thu a sawi.

Norwegian manager chuan, "City nena kan inkhelh hun hi insiamṭhatna hun ṭha a ni a, kan khelh ṭhat ngei pawh ka ring. Kan chak loh avangin player-te a hranpain kan hrem lo a, anmahniin hrehawm an ti vek. Mipui lam chuan theihtawp kan chhuah chhung chu min ṭawiawm ang," tiin team boruak chungchang a sawi.

Solskjaer chuan season thar atan erawh player ṭhenkhat lakluh leh chhuahtir a ṭul thu a sawi a, United manager tur atan a ṭhat tawk thu nimin press conference-ah hian a sawi lang bawk.

Arsenal lam hi...
Premier League champion tur a ngaihnawm ang bawkin Champions League khel tur zawnna a ngaihnawm a, Arsenal chuan zanin dar 12:15 hian Molineux Stadium-ah Wolverhampton Wanderers an hmachhawn dawn.

Gunners hian khualmualah record an nei chhe hle. Tun season league match 16 khualmuala an khelhah vawi ruk chiah an chak a, vawi ruk chak loin vawi li an inhnehtawk. An khelhna tur Molineux Stadium hi club lian chetchhiatna hmun a ni bawk.

Tun season-ah Wolves hian an mualah Man United chu vawi hnih an hneh a, Chelsea (league) leh Liverpool (FA Cup) pawh an hneh a, Manchester City an chelh bawk. Khualmualah pawh Wolves hian Man United leh Arsenal te an draw a, Tottenham an hneh bawk avangin club lian ngamtu tia sawi an ni.