Tottenham chakna Christian Eriksen

Tottenham Hotspur chuan Premier League nomawi beisei tawh lo mah se season thara Champions League khelh an tum ruh hle. Hun tawp dawna Christian Eriksen goal hmanga Brighton & Hove Albion 1-0 a hnehin table-ah pathumna an nih chhunzawm.

Inhamtang tura point mamawh Brighton an chak loh avangin an tan hna a hautak chhunzawm dawn a, tla thei china awm Cardiff aia an san zawkna chu point thum chiah a ni. Match thum khelh hmabak an la neihah Arsenal leh Manchester City an la tawn dawn avangin hna a awlsam dawn lo.

Chak a ngai
Ṭhawhlehni zana inkhel ṭan hmain Tottenham manager Mauricio Pochettino chuan 'chak a ngai' tiin an match neih tur pawimawhna a sawi a, a nauten 78% ngawt ball possession nei zuiin goal khung tuma an pet zat pawh vawi 29 zet a ni.

Amaherawhchu, Brighton tlarhnung an dingkhawng tlat a, a tir lamah Spurs defender Toby Alderweireld chuan goal ban a pet per dawp bakah Lucas Moura leh Dele Alli te khung tur chu goalline aṭanga pet chhuah sak an ni. Danny Rose-a'n hla deuh tak aṭanga a pet chu Seagulls keeper Mat Ryan chuan dang perin crossbar a per hlauh bawk.

Match hnuhnung pasariha goal khung thei lo Brighton lamin Spurs tlarhnung an chhaih buai phak meuh lo a, counter attack hman tum mah se an hlawhtling lo. Lewis Dunk leh Shane Duffy ten set piece aṭanga an ball hmuh chu tauh luh theihna hun nei ve mah se goal zawnah an tauh thei lo.

Eriksen a class
Brighton tlarhnung an khawng a, Spurs striker Harry Kane awm loh laia goal khung khawl Son Heung-min vanneih zan a ni lo bawk. Ball chang tamin inkhel thunun viau mah se an hun ṭha neih zawng zawng chu a thamral mai dawn niin a lang hman.

Amaherawhchu minute 88-na a ni a, Christian Eriksen chuan Alli hnen aṭanga a ball hmuh chu hun rei lote chhunga insiamrempuiin, yard 25 zeta hla aṭangin ṭha zetin a pet - ball kalna hi goal ban hrul a nih avangin keeper khel ṭha tak Ryan tan dan theih a ni lo.

Denmark international Eriksen chungchang sawiin Poch chuan, "Hun pawimawh laiah mi pawimawh bik Christian a rawn inlar a ni. Player dang tan khatiang kha tih ve ngawt theih a ni lo a, a ti thei tlemte zinga mi kan nei hi kan vannei hle," a ti.

Real Madird nena an sawizawm player chungchang sawi zawmin, "Tunah chuan kan hnenah a awm, a pawimawh ber chu season tawpah eng nge kan thlen theih tih hre tura theihtawpa khelh phawt a ni. Christian hi kan hnenah a awm chhunzawm zel pawh ka beisei," a ti. Eriksen-a'n Spurs tana contract a neih lai hi season thar nipui laia tawp tur a ni.

UCL ticket
Tottenham hian Champions League semifinal an lut tawh a, Dutch club ṭha Ajax nen an inhmachhawn dawn. An champion a nih phawt chuan European football inelna sang berah hian season tharah pawh an inlan chhunzawm ang.

UCL-ah champion lo pawh ni se Premier League-ah palina chin an nih chuan an tling dawn tho. Match thum khelh hmabak an la neihah palina Chelsea aiin point thumin an hmu tam zawk - Blues hian match khatin an khel hnem zawk bawk a ni.

Spurs manager Pochettino chuan, "A sang pali zinga awm leh awm loh chu kan kutah a innghat. Match khelh hmabak pathum kan neihah hian kan chak vek a nih phawt chuan pathumna kan ni ang," tiin a sawi.