Ajax tan champion a hnai zel

European football barakhaiha Champions League semifinal hial inpetkai Ajax-in treble champion an beiseina ti hlawhtling turin kawng dik an zawh zel.

Champions League aṭanga Real Madrid leh Juventus pet chhuaktu team hian Thawhlehni zan khan Dutch league-ah Vitesse Arnhem chu 4-2 in an hneh a, Eredivisie champion nih an hnaih leh ta sawt.

Ajax tan Hakim Ziyech chuan goal hmahruai a khung a, Dusan Tadic chuan penalty an hmuh vawi hnih ngawt chu goal-ah a chantir ve ve a, captain naupang Matthijs de Ligt chuan goal khat a thawh bawk.

Eredivisie-ah Ajax hian league match hnih chiah khelh tur nei tawhin hma an hruai mek a, an hnuai chiahah hian season hmasa champion PSV Eindhoven an awm.

PSV hian match khata khel tlemin Ajax hi point thumin an phak lo mek. Mahse, PSV hi chak pawh ni se goal difference-a Ajax an phak lohna hi 13 ngawt a la ni rih a, Ajax dinhmun a ṭha zawk.

Ajax hian Dutch Cup final an lut tawh bawk a, April 30 zanah Tottenham Hotspur nen Champions League semifinal first leg an khel bawk ang.