Mizoram dinhmun a hriat dawn

Hero Junior Girl's National Football Championships 2019-ah Mizoram hmeichhe team chuan vawiin chawhma dar 9:30 hian group match hnuhnung berah Kerala an hmachhawn dawn a, point an hlawh chhuak hrim hrim a nih chuan quarterfinal an lut ang.

Inelna hi Kolhapur, Maharashtra-ah neih a ni a. Mizoram hian an match hmasa berah Punjab 9-0 zetin an sawp a, hemi zawh hian Andhra Pradesh 7-0 in an hneh leh bawk.

Vawiina an khingpui tur Kerala pawhin Andhra Pradesh (6-0) leh Punjab (3-0) te an hneh ve ve a, amaherawhchu Mizoram hian goal an khung hnem zawk avangin an dinhmun a ṭha hret.

Team pahnih hian match hnih an khelh tawh aṭangin goal an la chhuah lo a, vawiin hian team ṭha zawk a hriat ang. Mizoram hi coach Vanlalpeka leh man-ager Mary Lalawmpuii (Lakuri) ten an enkawl a ni.