MMA Gym Challenge neih a ni dawn

Mizoram State MMA Association (MISMA), Zo Fight Promotions leh Zonet ṭangkawp chuan MMA Gym Challenge an huaihawt dawn a, gym level MMA fight inelna hi May aṭanga neih ṭan tur niin December thleng a awh ang.

Inelna hi Zonet Rihnim chuan en theihin a pe chhuak ṭhin dawn a, kartin Ningani zan dar 8:00 apiangin en theih turin phochhuah a ni ṭhin dawn a, Radio Gupshup 94.3 FM chu radio partner an ni bawk.

Fighter te hi class A, B leh C ah ṭhen an ni dawn a, fight apiangin fighter ten pawisa an dawng ṭhin ang.

Professional rules-a MMA lo khel tawhte leh Mizoram Fight League/National champion lo ni tawhte chu Class A-ah hian dah tur niin fighter ten an level pui zel hmachhawn turin ruahmanna hi siam a ni.

MMA Gym Challenge tel tumte tan Inrinni hian SPES Gym, Dawrpui-ah inbuk tur a ni a, medical check neih nghal a ni ang a, MSACS nena ṭangkawpin HIV test neih tur a ni bawk. Hrechiang duh tan phone no. 9774402124-ah ngaihven theih a ni.