TNT an chak lo nawn

Tualchhung volleyball tingaihnawma tihlutu pakhat TNT chuan Suzuki Gixxer Pro Volleyball League 2019-ah bul an ṭan fuh lo. Muanna Veng team hi match hnih an khelh tawhah an la tlawm ve ve a ni.

Thawhlehni zan Chawnpui Sports Centre-a inkhelah Chhinga Veng Spikers chuan TNT hi 15-7, 15-4, 11-15, 15-13, 20-18 (4-1) in an hneh a, Spikers point hmuh zawng zawng aṭanga 47% zet hlawh chhuaktu Mandeep Singh chu RS Traders Player of the Night atan thlan a ni.

Mizo hlanga khel TNT hian an match hmasa zawkah champion lai Hunthar an ngam lo a, tun PVL-ah chak ni hmel la hmu lo mah se set thum an lak ve tawh avangin point thum an khawlkhawm tawh - semifinal beiseina a la bo bik lo. TNT hian April 29 zanah Chanmari West an hmachhawn leh dawn.

Team indinthar Chhinga Veng erawhin an match hmasa lamah Tuichangral an sawp tawh bawk, Inrinni zanah Anastasia Electric Veng an hneh zui leh a nih chuan semifinal khel turin an dinhmun a ṭha tawh hle ang.

Zanin hian a hmun ngaiah inkhel a awm leh dawn. Champion lai Hunthar leh Chanmari West an inhmachhawn dawn a, tawnhriat ngah Hunthar hi chak zawk tura rinkai an ni. Durtlang North laka set la lo Chanmari West tan fiahna hautak a ni dawn.