MFA Women's League GSA ITI Veng an champion

MFA Women's League hmasa ber chu Thawhlehni zan khan Lammualah khelh zawh a ni a, GSA ITI Veng chuan Maubawk Women's FC chu 3-1 a hnehin an champion. Final hmuhnawm takah Maubawk-in Zairemmawii hmangin khung hmasa mah se GSA ITI Vengin Lallungmuani, Lalremruati leh Ruthy Lalrinmawii te hmangin an lehthal.

League round-a pakhatna Vakiria FC chuan fairplay award an dawng a, an player pawimawh Grace

H. Lalrampari chuan goal kua khungin top scorer a ni a, Lalnuntluangi leh K. Lalruatfeli te chu best forward leh best defender-a thlan an ni. Champion team GSA ITI Veng innghahna PC Lalduhthlani chu best midfielder a ni a, Maubawk WFC keeper Lalmuanawmi chu best goalkeeper-a thlan a ni.

Final chu
GSA ITI Vengin inkhel an thunun a, goal khung erawh an harsat. First half tawp hma hretin Maubawk Women's FC-in Zairemmawii hmangin an pet goal hmasa a, Zaii hian corner kick aṭangin a pet goal.

Second half-ah GSA ITI Veng an khel ṭha chhunzawm a, an nawr nat rah an seng. Minute 55-naah Duthlani corner pet chu Lungmuani'n a tauh lut a, 1-1 a ni. Minute sarih hnuah corner kick bawk hmang ṭangkaiin Lalremruati'n hmahruaina goal a khung.

Maubawk-in si an phurh hnuah an nawr let ve thung a, amaherawhchu injury time-ah an nawr luat an tuar lo. ITI Vengin counter attack hmanga nawr letin Ruthy Lalrinmawii chuan chak nemnghehna goal a pet lut.

GSA ITI Veng coach Lalrintluanga Tlau chuan, "Player enin team ṭha ber kan ni lo a, amaherawhchu kan team hruaitute hi team tan hian an inpe em em a, an thawhrimna zara hetiang dinhmun thleng thei hi kan ni," tiin a sawi.

A hlawhtling
Women's League Board vice chairman Francis Paul chuan, "Veng hrang hrangin khelmual an nei a, amaherawhchu zing leh tlaiah hmeichhe tan zuah a ni lo. Mizo hmeichhe player ṭhate pawh hian inkhelhna hun hi an lo nei meuh lo a, chuvangin Women's League hi nuam an ti lehzualin ka hria. Chu bakah team tam zawk hi veng behchhan nei an ni a, final-ah phei chuan inkhel entu an ṭha hle a ni. Hun chep tak karah MFA-in Women's League a buatsaih thei hi a lawmawm takzet a ni," tiin inelna a hlawhtlin thu a sawi.

GSA ITI Veng coach Lalrintluanga Tlau (Saitea) chuan, "MFA-in hmeichhe football inelna an siam hi a lawmawm hlein ka hria. Tun hmain thingtlang aṭangtein inkhel turin Aizawlah an rawn zin a, Mizoram tana an khelh bak kha chu khelh tur mumal a awm lo. Tunah erawh Women's League a awm tawh a, coach ṭha enkawlna hnuaiah inelna ṭha an hmachhawn a, Mizoram hian India ram hmeichhe football-a roreltu Manipur pawh hun rei loteah kan elphak ve mai ka ring. Mipa football kan thlir chuan MPL awm hnuah Manipur chungah kan awm a ni," tiin Vanglaini a hrilh.

Saitea hian MPL club Luangmual FC leh Dinthar FC te a enkawl tawh a, a fanu Ruth Vanlalpeki pawh inkhel ṭhin niin GSA ITI Veng tan hian a khel. Amaherawhchu Junior Girls Football C'ship khel tura a zin avangin Ruth-i hi knockout stage chinah a inlan tawh lo.

Final
Maubawk Women's FC 1 - 3 GSA ITI Veng
MWFC : Zairemmawii 35'
ITI : Lallungmuani 55'; Lalremruati 62'; Ruthy Lalrinmawii 70+4'

Lawmman
Champion GSA ITI Veng Rs 50,000+Trophy
Runners Up Maubawk WFC Rs 25,000+Trophy
Semi Finalists Vakiria FC & Chanmari WFC Rs 10,000
5th Place Siaha District FA Rs 8,000
Fair Play Award Vakiria FC Rs 10,000+Trophy

Mimal Lawmman
Best Forward Lalnuntluangi Vakiria FC
Best Midfielder PC Lalduhthlani GSA ITI Veng
Best Defender K. Lalruatfeli Vakiria FC
Best Keeper Lalmuanawmi Maubawk WFC
Top Scorer Grace H. Lalrampari (9 Goals) Vakiria FC
Mimal lawmman latute hian trophy leh Rs 1,000 ṭheuh an dawng tel a ni.