Badminton Regional Development Centre hawng

Mizoram badminton-in awmze neia hma a sawn theih nan 'Badminton Initiative' an duang a, an ruahmanna hlawhtlin theihna turin hma an la chho zel. Thawhlehni khan Regional Development Centre (RDC) hmasa ber chu Chanmari West Indoor Stadium-ah Sports and Youth Services director Zothanmawia'n a hawng.

Mizoram Badminton Association, TATA Trusts, North East Initiative Agency (NEIDA), Gopichand Badminton Academy leh Mizoram sorkar ṭangrualin Mizoram hmun hrang hrangah Badminton Grassroots Programme an kalpui mek a. Grassroots hi Badminton Initiative-a a bul ṭhut a ni a, naupang badminton tui tawh phawt tana tel theih turin ruahmanna hi siam a ni.

Tun ṭuma an hawn Regional Development Centre hi Grassroots-a naupang ṭha bik leh hmasawn thei tura beiseite tana buatsaih a ni a. Heta awm tur hi Gopichand Badminton Academy ten an thlang. RDC-a naupang ṭha bik hi Gopichand Badminton Academy leh National Ranking Tournament-ah te hruai ṭhin an ni ang.

Mizoram Badminton Association chuan he programme a hlawhtlin theih nana tha tam tak sengtu Chanmari West Indoor Stadium enkawltu Chanmari West Sporting Club te hnenah leh mi inpe te hnenah lawmthu an sawi.