City leh Reds player karah Pogba

Premier League PFA Team of the Year 2018-19 a chiang ta a, champion tuma inum lai Manchester City leh Liverpool player kara hming awmchhun chu Manchester United midfielder Paul Pogba chiah a ni.

Pep Guardiola enkawl City hian goalkeeper Ederson, centre back Aymeric Laporte, midfielder Bernardo Silva leh Fernandinho te bakah forward Sergio Aguero leh Raheem Sterling te an thawh a. Season hmasa khan City hian player 11 zinga panga chu an lo thawh tawh bawk.

Professional Footballers' Association ten an thlan chhuah dang chu Reds tana vul lai defender Andrew Robertson, Trent-Alexander Arnold, Virgil van Dijk leh forward Sadio Mane te an ni thung.

Man City leh Liverpool player an tam viau laiin league goal 19 khung tawh Mohamed Salah leh Arsenal striker Pierre-Emerick Aubameyang te hming a lang lo. Tottenham striker Harry Kane chu tun hnai season nga chhunga a vawi khat nan a tel lo a, Real Madrid nena sawizawm hlawh Eden Hazard pawh telh a ni lo bawk a ni.

PFA Team of the Year 2018-19

Goalkeeper: Ederson (Manchester City).

Defender: Trent Alexander-Arnold (Liverpool), Aymeric Laporte (Manchester City), Virgil van Dijk (Liverpool), Andy Robertson (Liverpool).

Midfielder: Paul Pogba (Manchester United), Fernandinho (Manchester City), Bernardo Silva (Manchester City).

Forward: Raheem Sterling (Manchester City), Sergio Aguero (Manchester City), Sadio Mane (Liverpool).