ATP Finals khelhna tur Turin

Mipa tennis thiam zual pariat ten season tawpa an khelh ṭhin ATP Finals an khelhna hmun chu London aṭangin Turin-ah sawn a ni dawn. Italian khawpui hian 2021-2025 chhung he inelna hi a thleng ang.

Khawpui dang pathum Manchester, Singa­pore leh Tokyo te chu he inelna lian thleng tura sawilan zingah an tel. ATP executive chairman Chris Kermode chuan, "Turin hian inelna lian thleng tura mamawh leh ṭul ang chu a nei," tiin Turin an thlan chhan a sawi.

ATP Finals hi 2009 aṭang khan O2 Arena, London-ah hian khelh ṭhin a ni a, 2021 aṭanga an khelhna tur hi Pala Alpitour stadium, Turin a ni. Inelna hi khawpui hrang 15 in an thlenna tur chiah a ni dawn, Italy ramah chuan an vawi khat nghahna a ni thung.

Pala Alpitour stadium hi 2005-a sak zawh kha niin Italy ramah chuan indoor stadium lian ber a ni a, mipui 15,000 vel an leng - ATP Finals an thlen dawn hnaiah chuan hmun ṭhenkhat lai thuam thar a siamṭhat tum a ni bawk.

Season hmasa ATP Finals-ah khan Novak Djokovic leh Alexander Zverev ten nomawi an inchuh a, inkhel hmuh­nawm takah German player Zverev-a'n hnehna changin nomawi a chawi tawh zinga hlu ber chu a hlawh chhuak a ni.