Liverpool-in United an beisei sang mah mah
Manchester City-in Nilaini zan khan Old Trafford an luhchhuah a, Manchester United 2-0 in an hneh. Premier League match thum chauh khelh hmabakah Pep Guardiola hote hi hmahruaitu an ni a, Liverpool erawh an hmelma United-in an beisei an tihhlawhtlin sak loh avangin pahnihnaah an lungawi a ṭul a, an la chawi ngai loh nomawi thlir liam leh thei dinhmunah an ding.
Manchester Derby hian champion tur leh Champions League khel tur a hril theih avangin ngaihven a hlawh a, amaherawhchu Everton laka mualpho United-in kawng tin rengin champion lai City an elpha lo. First half-ah goal a luh loh hnuin Bernardo Silva leh substitute Leroy Sane ten mikhual team tan an khung.
Reds beiseina
Liverpool legend Jamie Carragher chuan instagram-ah Manchester United jersey a hakna a rawn pholang a, Reds midfielder James Milner chuan a vawi khat nan United a ṭan tur thu a sawi bawk.
Inkhelh hmain Liverpool hi Premier League hmahruaitu an ni a, match khata khel tlem Man City aiin point hnihin an sang zawk. Kop tan chuan an hmelma United chak hi duhthusam a ni a, amaherawhchu an khingpui tur Man City an nih miau avangin inhnehtawkpui tal se tih chu an beiseina a ni.
An inrem e
Man City-in inhliam vangin Kevin De Bruyne leh Claudio Bravo te chiah an chhawr thei lo a, bul ṭantute chu Ederson; Kyle Walker, Vincent Kompany (c), Aymeric Laporte, Oleksandr Zinchenko; Ilkay Gundogan, Fernandinho, David Silva; Bernardo Silva, Sergio Aguero leh Raheem Sterling te an ni.
City player zinga langsar lo deuh bera ngaih Zinchenko hian Benjamin Mendy awm loh laiin left back atana rin ngam a ni tih khelmualah a pholang a, a game a fin piah lamah ball pass a thiam avangin Pep Guardiola lawm zawng player ti pawhin a sawi theih. Derby boruak a danglam ṭhin avangin tawnhriat nei ṭha Kompany-a'n defence laiah John Stones a rawn thlak chu mak tihna tur a awm lo bawk.
Man United chu 3-5-2 formation hmangin an rawn inrem a, David de Gea; Ashley Young (c), Chris Smalling, Victor Lindelof; Matteo Darmian, Andreas Pereira, Fred, Paul Pogba, Luke Shaw; Jesse Lingard leh Marcus Rashford te chu bul ṭantu an ni. An formation hman hi player khelh ṭhin dan aṭanga teh chuan 5-4-1 ti pawhin a sawi theih a, Champions League khelh ngei tumin point hlawhchhuah an tumah a ngaih theih.
Khelh thut luhai
Manchester United-in bul an ṭan chhe lo a, risk lain Man City defender pressure an pe nasa. Tottenham laka thapui chhuah zo hlim Pep Guardiola nauten ngai an la awh lo tih a lang a, an khel fuh hleithei lo. Boruak sang ngam ber tura ngaih Kompany meuh pawh a talbuai a, ṭul miah loa yellow card a hmu chuan inkhel a awlsam lo tih a tilang.
Team pahnihin chance ṭha an insiam thei lo a, inkhel thunun tura ngaih Man City eng ruai an ni lo. Chutihrualin first half bikah erawh chance nei ṭha zawk an ni a, season hmang ṭha Raheem Sterling-a'n first half tawp hma hretin chance ṭha a hlah. United lam tan Rashford-a'n chance naran a nei ve bawk a, hun chanve hmalamah goal a lut lo.
A thiam an dang
Second half-ah erawh Pep Guardiola naute danglamna a lang a, awmze neia khel ṭhin Man City-in an theihna anga an khelh meuh chuan Liverpool ṭantute pawh, "Thlamuanna pe thei lo laka thlamuanna an zawn avangin an inchhir," thei hial ang.
Manchester United manager hlui Sir Alex Ferguson-a'n 'ṭhenawm bengchheng' tia a sawi liam mai ṭhin Man City chuan tun hnaiah nasa takin hma an sawn a, Ole Gunnar Solskjaer enkawl United nen huang khata dah theih an ni lo. Mi tam takin keeper ṭha ber tia an sawi ṭhin David de Gea lah Russia ramah World Cup a khelh hnuah ngai a la awh leh tawh lo a, United chhandamtu tia an sawi fo ṭhin kha tunah chuan tlarhnung ti pawp belhchhahtu zinga mi a ni.
Minute 54-naah City-in Bernardo Silva hmangin hma an hruai a, minute 66-naah Leroy Sane-a'n khung belh leh bawkin David De Gea-a'n a tihtur a ti tawk lo a, Spanish keeper chet dan hian United dinhmun a sawifiah chiang hle. Man City tlarhnung erawhin buaina tur an nei meuh lo a, goal hnih an khung inkarah hian Jesse Lingard-a'n goal ruakah a khung lo thung.
Man United khelh dan sawifiahna ṭha ber chu mipui chet dan a ni a, hun tawp thlenga chak beiseia an ṭhut ṭhupna ṭhin Old Trafford chu hun tawp lamah a ruak hle.
