Mizoramin quarterfinal an lut

Hero Junior Girl's National Football Championships 2019-ah Mizoram hmeichhe team chuan knockout stage lut turin nimin khan Kerala 4-2 in an hneh. Mizoram hian quarterfinal-ah Gujarat an hmachhawn dawn a, Polo Ground-ah April 27, Inrinni tlai dar 4:00 hian an inkhel ang.

Kolhapur, Maha-rashtra-a inelna neihah Darlawn tleirawl Lalrin-muani a che ropui zel a, Chanmari Women's FC player hian Kerala lakah hian hattrick a siam a, hemi hmaa an match hmasa pahnihah hattrick siam ve vein tun inelnaah goal kua a khung tawh.

Kerala player Sonia Jose chuan an lamah a tihluh bawk avangin Mizoram hian 4-0 in hma an hruai a, second half-ah Kerala hian Sreelakshmi leh Area Sree hmangin siphurh sut ṭhen mah se team ṭha zawk coach Vanlalpeka hoten harsatna an tawk lo.

Mizoram manager Mary Lalawmpuii (Lakuri) chuan, "Kerala hi team ṭha tak an ni a, inkhelh ṭantirh lama goal kan khung tam kan vanneih pui. Coach ṭha tak kan nei a, kan chakna leh chak lohna a zir uluk ṭhin a, amah hi kan chakna hnar a ni," tiin Vanglaini a hrilh.

Mizoram hi group H-ah pakhatna an ni a, match thum an khelhah chak vekin goal 20 an khung a, goal hnih chiah an chhuah. Quarterfinal-a an khingpui tur Gujarat hi Bihar leh Telangana te awmna group F aṭanga pakhatna an ni ve bawk.