Inelna thlengtu Lawngtlai an chak

19th MFA Cup 2019 chu Lawngtlai khelmual CYLA Playground-ah khelh chhunzawm zel a ni a, nimin khan inelna thlengtu Lawngtlai FC-in FC Kawrtethawveng 3-1 in an hneh a, semifinal luh beiseina an neih laiin Mamit DFA hnuaia club FC Kawrtethawveng erawh an tla thung.

Group A inkhel dangah match hmasa bera chak pahnih Kahrawt FC leh Zotlang FC te 3-3 in an inhnehtawk a, Lunglei club Zotlang hian match hmasa berah Lawngtlai an hneh tawh avangin semifinal lut turin an dinmun a ṭha hle. Champhai club Kahrawt erawhin match hnuhnung berah inelna thlengtu Lawngtlai FC an hmachhawn dawn a, knockout stage lut turin point khat tal hlawhchhuah a ṭul ang.

Vawiin hian group B te an inlan dawn a, zing dar 8:00-ah match hmasaa hnehna chang AFC Junior leh Siahatla te an inkhel ang a, tlai dar 3:00-ah point la hmu lo Serchhip club FCSK leh Kolasib DFA aiawh FC Rengkhawpui te an inkhel ang.