Turf Moor tlawh tur Man City

Manchester City-in Old Trafford an luhchhuah hnuin Turf Moor an tlawh dawn a, Pathianni zan dar 6:35 hian Burnley an hmachhawn dawn. Pep Guardiola hote tan Premier League nomawi humhim turin match thum khelh hmabakah chak vek a ṭul a, chuvangin Man City inkhel zawng zawng hi a pawimawh vek tawh a ni.

Manager ropui Pep
Pep Guardiola hian kum 50 pawh a la tling lo a, chuti chung chuan a hmaa nomawi inchhawp hi chu a chawi zel. Champions League nomawi ṭum hnih a chawi tawh a, ram pathumah league title pasarih a la tawh a, hei bakah hian nomawi 17 dang chawi tawhin a la chawi belh zel ang.

Kum 48 mi Guardiola hian Barcelona a enkawltirh khan a treble champion pui nghal a, Bundesliga-ah pawh harsatna nei miah loin season thum chhung a champion nghal. Heti chung hian Catalan mi Guardiola hian tun hnaia a hlawhtlinna hi a dah sang hle.

Man City manager Guardiola chuan, "Barcelona leh Bayern Munich-ah hun duhawm tak kan hmang tih zep rual a ni lo. Chutihrualin Premier League hi chu a dang. Ni thum danah te kan inkhel a, tharum hman a ngai nasa a, eng team lakah pawh tlawm theih a ni. Chu chauh ni loin kan elpui hi Liverpool ka hmuh tawh a zawnga la ṭha ber an ni a, keini lamah player pawimawh inhliam kan ngah ṭum a ni a, chuvangin kan thlen chin hi a sang em em a ni," tiin a sawi.

Citizens hian Pep Guardiola hmain Premier League nomawi pahnih an chawi tawh a, tun ṭuma final an luhna FA Cup leh an champion tawhna League Cup-ah pawh an champion tawh a, amaherawhchu Spanish manager awm hnua Man City hi chu team dang daih an ni a, team zawng zawng hlauh rawn a ni a. Awlsam taka Old Trafford-a hnehna an chang thei hian Man City ṭhat zia a pholang a, an point hmuh zat hi an thiamzia sawifiahtu a ni.

Season liam taa league champion an nih khan point 100 zet an hmu a, tun season-ah pawh an khelh hmabak an chak vek chuan point 98 an hmu dawn. Guardiola ropui zia sawi nep nan Man City sum hman tam zia sawi ṭhin a ni a, uluk taka zir chian erawh chuan 'thudik chanve' chauh a ni. City ang thoin an elpui Manchester United, Liverpool, Arsenal leh Chelsea te pawhin sum an hmang nasa vek a, an player manto ber ṭheuh khaikhin phei chuan Gunners chiah anni aia sum seng tlem an awm.

Nomawi a hnai
Manchester City hian hun rei zawk nomawi pali 'quadruple' an beisei a, hei vang hian an elpuite aiin khelh tur an nghah. An elpui ber Liverpool erawh League Cup leh FA Cup-a an match hmasa berah an tlak nghal avangin fixture nuam sa zawk nen Man City hi an elpha hram hram a, tunah erawh Pep Guardiola hote hi Champions League aṭanga an tlak tawh avangin Reds aiin hahdamna hun an ngah tawh zawk.

Premier League champion lai hian Pathianni zana an khingpui tur Burnley hi tun season-ah league leh FA Cup-ah an hmachhawn tawh a, 5-0 ve ve in an hneh. Ngaih ṭhat lohna tur a awm a nih chuan Turf Moor an tlawh hnuhnung berah 1-1 in an inhnehtawk a, Clarets hian an match hnuhnung ber Stamford Bridge-a khelhah point khat an hlawh chhuak bawk. Chutihrualin City player pawimawh zingah Kevin De Bruyne chiah inhliam a awm a, Pep-a hote hi chesual lo tura ngaih an ni.

Nizan khan Liverpool-in tla tawh Huddersfield an mikhual a, Man City hi an inlan leh hunah chuan Premier League hmahruaitu ni loin pahnihna nichungin a inlan a rinawm bawk.

Zanin Inkhel Tur
Tottenham Hotspur 5:00 PM West Ham United
Crystal Palace 7:30 PM Everton
Fulham 7:30 PM Cardiff City
Southampton 7:30 PM AFC Bournemouth
Watford 7:30 PM Wolverhampton
Brighton & Hove 10:00 PM Newcastle United
March 28, Pathianni
Leicester City 4:30 PM Arsenal
Burnley 6:35 PM Manchester City
Manchester United 9:00 PM Chelsea