Pliskova tlak niah Osaka a chak

Hmeichhe tennis world number 1 Naomi Osaka chuan clay court season bul a ṭan ve ta. Ningani zan khan Osaka hian Stuttgart Open-ah Hsieh Su-wei hnehin last 16 a paltlang.

Japanese nula Osaka leh Taiwan player hi March thla khan Miami Open-ah an intawng tawh a, Grand Slam vawi hnih champion tawh Osaka hi a chak lo zawkah a ṭang - tun ṭumah erawh result a inthlakthleng ta a ni.

Australian Open champion Osaka hian a match lehpekah chuan Donna Vekic a hmachhawn dawn, Croatian nula hian inkhel dangah Russian player Daria Kasatkina chu 6-1, 7-5 in a lo hneh ve bawk.

Osaka a chak lai hian Stuttgart Open champion lai Karolina Pliskova erawh Victoria Azarenka hneh loin a zinkawng a tawp thung a, nomawi a kawl lai a hum thei dawn ta lo. Seeded palina Pliskova hian set hmasa ber chu harsa vak loin a la mai. Mahse, set hnuhnung zawkah a hnufual zawk a nih avangin 4-6, 6-3, 6-4 in a tlawm - hnehna changtu Azarenka hian Anett Kontaveit a hmachhawn ve leh thung dawn a ni.

Stuttgart Open-ah hian hliam vangin Simona Halep chu a inlan thei lo a, Romanian nula hi a khel bawr na vangin hun tepter tawh takah a inhnukdawk. Clay court inelna lian leh ngaihhlut ber French Open-ah erawh a inlan theih beisei a ni.