Chanmari West tan champion lai an thiam lua

Ningani zan Suzuki Gixxer Pro Volleyball League 2019 inkhelah Hunthar chuan Chanmari West 7-15, 15-11, 15-12, 13-15, 15-12 (3-2) in an hneh a, champion lai Hunthar hian match hnih khelhah point ruk hmuin pathumna an ni.

Chawnpui Sports Centre-a inkhelah Hunthar thiampuipa Deepesh Kumar Sinha chu RS Traders Player of the Night atan thlan a ni. India senior team tana khel phak Deepesh hian point 30 ngawt a thawk chhuak a, an team pumpui point hmuh zinga 46% zet chu a kut aṭanga chhuak a ni.

Chanmari West lamin an match hmasa zawka Durtlang North an ngam loh ṭumin set an la miah lo a, tun ṭumah hian hnehna chang lo mah se set hnih an lak ve theih tak avangin an inkhelah hmasawnna a awm.

A zawna vawi thum champion tum Hunthar hian April 30-ah Durtlang North an hmachhawn leh dawn, team indinthar Chanmari West hian April 29 zanah Thutak Nunpuitu Team, Muanna Veng an tum ve leh thung ang.

Zanin hian a hmun ngaiah inkhel a awm leh dawn a, group hmahruaitu ni lai Chhinga Veng Spikers leh Anastasia Electric Veng te an inhmachhawn ang. Anastasia hi palina ni rih mah se PVL-a tawnhriat nei tawh an ni a, awlsam taka hneh theih an nih a rinawm lo.

April 25, Ningani zan

Senior Team
Hunthar bt Chanmari West
7-15, 15-11, 15-12, 13-15, 15-12 (3-2)
RS Traders Player of the Night: Deepesh Kumar Sinha, Hunthar

Junior Team
Hunthar bt Chanmari West
15-10, 13-15, 15-7, 18-16, 19-17 (4-1)

Zanin Inkhel Tur

Junior Team
Anastasia Electric Veng 6:00 PM Chhinga Veng Spikers
Senior Team
Anastasia Electric Veng 8:00 PM Chhinga Veng Spikers