Pathianni zan dar 9:00-ah Manchester United Vs Chelsea
Manchester United-in tun hnaiah result ṭha an nei meuh lo a, Chelsea-in club lian khelmualah record ṭha an nei bik lo. Premier League club ṭha pahnih hi Pathianni zan dar 9:00 hian Old Trafford-ah an inhmachhawn dawn a, Champions League hmunruak an inchuh ang.
UCL Ticket
Premier League-a palina chin tan season tharah Champions League a khelh theih a, tun season-a UCL leh Europa League khelh meka champion tan season tharah Europe-a inelna sang berah a tel theih bawk.
Liverpool leh Tottenham Hotspur ten Champions League semifinal an lut a, amaherawhchu Reds emaw Spurs hian nomawi pawh chawi se English club pali tho an inlan dawn. Chutihrualin London club hi palina china an awm phak loh erawh chuan English club pangain UCL an khel ang. Chumi awmzia chu Spurs leh Reds hian UCL chawi pawh ni se anmahni bakin hamṭhatna hi an dawng thei lo.
Europa League lamah Arsenal leh Chelsea ten semifinal an lut a, anni pawhin nomawi an chawi a nih chuan hamṭhatna chu an club tan chauh a ni ang. Champions League khelh tuma inchuh club pali zingah Manchester United tan Europe club inelna sang bera khel turin Premier League chiah kawng a awm.
Team talbuai
Manchester United-in Norwegian manager an lak ngheh khan 'Ole Gunnar Solskjaer-a'n a fawng a vuan e' tiin an phur hle. Mahse tunah erawh match hnuhnung pakuaah vawi hnih chiah an chak avangin an manager tawnhriat nei tlem hi an 'sit' ṭan a, player an mawhpuh bawk.
Chelsea pawhin Maurizio Sarri an lakluh tirh khan 'Sarri Ball' chu an titi tui ber a ni a, tunah chuan Italian manager kal khat tak hi an hne ṭan tawh. Thuthang thar berah chuan Blues coaching staff-ten season tawp rualin an hna an chan dawn niin khawtlang chanchinbute chuan an ziak.
Hei bakah hian Chelsea hi club lian ho khelmualah an che chhe thei hle. Tun season-ah Tottenham (3-1), Arsenal (2-0), Manchester City (6-0) leh Liverpool (2-0) te an hneh lo vek a, pasarihna chelh mek Woverhampton Wanderers (2-1) pawh an hneh chuang lo. Pathianni zana an khingpui tur United pawh hi Stamford Bridge-ah 2-2 in an draw hram a, Solskjaer-a kaihhruai hnuah FA Cup-ah an hneh lo bawk.
Buaina leh chanchin ṭha
Manchester United innghahna David de Gea leh Paul Pogba ten beisei an pha lo a, season thara chhuak tura sawi an ni bawk. Chelsea pawh an thiampuipa Eden Hazard chu Real Madrid lamin an zar buai reng a, rawlthar duhawm Callum Hudson-Odoi pawh Burnley nena an inkhelh ṭuma a inhliam avangin tun season-ah a inlan theih a rinawm tawh lo.
Chutihrualin United midfielder pawimawh Ander Herrera chu match ruk a khelh theih tawh loh hnuah a inlan theih an beisei a, Spanish midfielder a awm theih chuan Pogba khelh dan thlengin nghawng awm tur a ngaih a ni. United boss Solskjaer chuan, "Pogba a chhuah ka ring lo a, amah hi hruaitu tlak a ni. De Gea pawh ka ringtawk," tiin a player pawimawh te a rin zel thu a sawi bawk.
Chelsea pawhin N'Golo Kante chu hliam tenau a tawrh hnuah an chhawr theih an beisei a, Eden Hazard a dam ṭhat bawk avangin Old Trafford-ah hnehna chan beiseiin an lut ang.