Nadal-a'n a ṭhianpa Ferrer a hneh

Barcelona Open vawi 11 champion tawh Rafael Nadal chuan a ṭhianpa leh elpui ni bawk David Ferrer 6-3, 6-3 a hnehin quarterfinal a inhlangkai a, nizan khan Jan-Lennard Struff nen semifinal luh inchuhin an inhmachhawn.

World number 2 Nadal hian kuminah beisei angin clay court-ah bul a ṭan fuh lo. Monte Carlo Masters nomawi a kawl lai a hloh a, tun inelna an hmachhawn laiah hian kum li chhunga a vawi khat nan Leonardo Mayer lakah set a hloh bawk.

Amaherawhchu, Ningani zan khan Ferrer lakah erawh inkhel a thunun hneh hle, a khingpui service hi vawi li chhuhsakin a service chu vawi khat chiah a hloh - French Open hma chuan ngai a awh leh hman ngei tura ngaih a ni.

World number 2 Nadal chuan, "Match hmasa berah ka khel ṭha tawk lo, inbuatsaihna hun ni khat ka neih ka hmang ṭangkai a, tunah chuan ṭha takin ka khel thei leh ta," tiin a sawi a, a ṭhianpa chu kum tam deuh tawh mah se hmachhawn harsa tak a la nih reng thu a sawi tel bawk.

Kum 37 mi Ferrer hian tun season bak tennis khelh a tum tawh lo a, May thla a khelh tur Madrid Open an neih zawh hnuah a chawl dawn - grass court season a hmang tawh dawn lo tihna a ni.

Spanish tlangval Ferrer chuan, "Rafa laka chak loh hi chu ka la na lo, hnehna chan tumin ka theihtawp ka chhuah chung pawhin ani hneh tur chuan a tawk zo lo," a ti. Spanish player pahnih hi 2013 French Open final-ah khan an intawng a, Grand Slam vawi 17 champion tawh Nadal zawkin hnehna a chang.

Inkhel dangah Kei Nishikori pawhin quarterfinal lut turin Felix Auger Aliassime chu 6-1, 6-3 in a hneh a, Japanese tlangval hian Spanish player Roberto Carballes Baena a hmachhawn leh dawn a ni.