Fak 'dawl' lo val rual an tlawm

Arsenal laka football hmuhnawmna tinreng an pholan vanga an fakna chil per pawh a hul hmain Liverpool chu dawl zawrin an zawr leh ta a, an mikhualna ramah Real Madrid chuan 3-1 in an lo hneh.

Real Madrid tan Vinicius Junior chuan goal hnih a khung a, Marco Asensio chuan goal khat a khung bawk - Liverpool tan Mohamed Salah chuan an beiseina chhi nung turin goal khat a khung. Reds manager Jurgen Klopp chuan, "Semifinal khelh kan duh a nih chuan a thiam pali zinga tel phu khawpin kan khel tur a ni a, chu chu kan ti si lo a ni," a ti a, hei hian inkhel a hrilhfiah.

Liverpool hian April 14 zanah Real Madrid hi an mikhual ve leh dawn a, khualmualah goal khat an khung avangin beiseina an la nei ang.

Thutlukna mak
Klopp-a'n Liverpool midfield-ah thutlukna mak angreng tak a siam a, Arsenal laka hmuhnawm khawpa inkawp Thiago Alcântara leh Fabinho bul a ṭan nawntir dawn emaw tih laiin Thiago aiah Naby Keita a luhtir.

German coach-in thutlukna a siamsual tih chu first half-ah hmuh theihin a awm nghal a, midfield-ah Thiago a awm loh avangin 'creative midfielder' tia sawi tur an nei lo a, Real Madrid lamin Toni Kroos leh Luka Modric an neih bawk si avangin an inthlau a ni.

Real hian minute 27-na lekah Vinicius hmangin goal an khung nghal a, he goal luh theih nana Kroos-a ball thlawh luh a ṭha a, Vinicius-a'n a awma ball la thla chungin assist mawi tak nena inrem turin a pet goal.

Goal an chhuah hnuah Liverpool an la insiamṭha chuang lo. Arsenal laka a khelh dan avanga fak hlawh Trent Alexander-Arnold a chesual a, a ball tauh sual aṭanga ball kal chu Asensio chuan lo chang fuhin Alisson-a pir khum hnuah goal-ah a chantir.

Beiseina
Liverpool-in goal hnih an chhuah hian Real lakah shot vawi khat pawh an la nei ve lo a, hei hian inkhel dinhmun thui takin a hrilhfiah - Klopp-a'n a tihsual a hmu vat a, Keita la chhuakin Thiago a luhtir.

Chawlhlawk hman a ni a, Liverpool player-ten thu ṭha an ngaithla tih lantirin an khel a danglam hret. Minute 51-naah goal an khung zui a, Salah chuan a thiam a la theihnghilh lo tih pholangin Liverpool tan si phurh a sut ṭhen. Liverpool an phur sawt a, chance pawh an nei - mahse, Salah leh Roberto Firmino aia luhtir Diogo Jota-ten an hun ṭha neih an chhawr thei lo a, minute 65-naah Real-in an hrem.

Brazilian rawlthar duhawm Vinicius bawk inlar lehin Real goal thumna a khung a, Alisson-te ang 'class' keeper tan chuan dan theih tur a ni. Mahse, Brazil international hian a dang lo miau a, Liverpool an zuih zui a, goal dang a lut tawh lo.

Inang lo
Real Madrid-in an captain Sergio Ramos an chhawr thei lo a, inkhelh hma lawkin Ramos nena ding dun ṭhin Rafael Varane chu Covid-19 vanga a inlan theih loh tur thu a chiang zui bawk.

Liverpool tan tun ang tluka Real tum châkawm lai a awm chuang lo - mahse, tawnhriat nei ṭha defender pahnih aia inlan Nacho Fernandez leh Eder Militao an khel ṭha takzet a, European football-a tlarhma hmuhnawm ni ṭhin Liverpool tlarhma an che hleithei lo.

Reds erawh an tlarhnunga Virgil van Dijk leh Joe Gomez awm loin fan-te lung a ti leng leh ang tih a chiang a, Nat Phillips leh Ozan Kabak tan anni pahnih hmun ruak luah tum chu a zau hret a ni. Khawvela full back inkawp hmuhnawm ber ang hiala tam takin an ngaih Alexander-Arnold leh Andy Robertson-ten season hmasa an la phak hleithei lo a, Real lakah an chesual hnem hle.

Referee kha
Asensio goal khung hma lawkin Sadio Mane lakah Lucas Vazquez-a foul a, referee-in ham ta se Asensio goal kha a lut lo ang - hei vang hian Jurgen Klopp-a lungawi lo.

German coach chuan, "Sadio chunga thil thleng kha ka ngaihtuah a, referee awm dan kha ka hrethiam lo. Ka ngaihdanah chuan referee khan professional taka thlir loin Sadio-a thlir a, tlu der ṭhin ang maiin a en a ni.

"Khata ṭang khan Sadio a tluk apiang khan a phu angin engmah a hmu ngai lo a, chu chu a dik lo a ni. He thu hi inkhelh zawhah pawh referee kha ka hrilh a, Sadio chungah khan fair taka thutlukna a siam loh thu ka hrilh," a ti!

Klopp chuan an chak loh chhan erawh a nih loh thu sawiin, "Referee thutlukna avang khan thil a inthlak viau lo a, referee ni loin keimahni kha chak lo chu kan ni. Result ṭha nei turin kan khel ṭha tawk lo a, chutihrual chuan hetiang ang inkhel pawimawhah chuan referee pangngai tak pawh a tawk em em ang," a ti a, a lungawi thei lo.

Hmabak chona
Liverpool-in kum 2019-a Champions League nomawi an chawi khan semifinal first leg-ah Barcelona chu 3-0 ngawtin ngam lo mah se 'comeback' ropui an lantir a, second leg-ah 4-0 a chakin an lehthal.

Mahse, kha 'comeback' ropuiah khan Reds vanneihna chu mipui an ni a, Anfield khat tlata fans an punkhawm avangin player-te pawhin phurna leh thathona an neih belh tih hai rual a ni lo. April 14 zana Real an mikhual hunah erawh Liverpool hian mipui chakna an ring thei dawn lo - comeback tura tih tur zawng zawng chu player leh coaching staff-te kutah a innghat.

Chutihrual chuan Reds-in Real an mikhual hmaa an hmachhawn tur hi Aston Villa (April 10) an ni a, Real erawh April 10 zanah vek Barcelona nen league match an khel dawn - La Liga nomawi beisei ve ve an nih avangin inkhel boruak a sang dawn a, an chak lo a nih ngat phei chuan harh vang taka Anfield pan an harsat ang.

Inkhel Chhehvel
• Real-in Champions League knockout match first leg-a hnehna an chan hnuhnung 16-ah vawi 15 chu knockout round an paltlang a, 2018-19 season khan last 16 first leg-ah Ajax ngam mah se second leg khelh hnuah an tlang zo lo.
• Champions League knockout stage-a first leg-a an tlawm hnuah England team 12 chu an tlang tho a, a ram ang zawng chuan Spain (14) chiah an phak lo. English club zinga first leg-a tlawm hnua CL knockout match aṭanga tlang hnuhnung ber chu Liverpool an ni a, 2018-19 semifinal-ah khan Barcelona lakah comeback ropui an lantir a ni.
• European football inelna hrang hrangah Real Madrid aia Liverpool hneh ngun an awm lo - Benfica nen Reds hi vawi li ve ve an hneh a, Los Blancos an hmachhawn hnuhnung paliah Liverpool hian Real hi an ngam lo vek a ni.
• Salah-a'n tun season-ah goal 27-a khung tling ta a, season hmasa ai khan goal liin a khung tam der tawh.
• Benzema-a'n Real tan Champions League match 108-a khel tling ta a, Spanish ni lo zingah Real tan CL-a heti zat inlan thei dang an awm lo - club pumpui ang chuan Ramos (128), Raul (130) leh Iker Casillas (150)-te a phak lo.
• April 2017 khan Kylian Mbappe chuan kum 18 leh ni 113 mi niin Borussia Dortmund lakah goal hnih a khung a, Champions League-a quarterfinal chung lam inelnaah French striker dawta match khata goal hnih khung thei naupang chu Vinicius a ni a, Liverpool laka goal-a khung khan kum 20 leh ni 268 mi a ni.
• Asensio-a'n Real tan match li chhung
chu a zawnin goal a khung ta a, hemi hmaa a match hnuhnung 41-ah goal li chiah
a khung.
• Zidane-a'n Champions League match 50-ah a team a kaihruai ta a, vawi 31 hnehna a chang. German coach ropui Jupp Heynckes kha Champions League-a a match hmasa 50-a Zidane aia chak hnem awmchhun a ni - vawi 32-a chak.