Clay court-ah Federer inlan dawn

Roger Federer chuan Madrid Open atan a hming a pe lut a, Spain khawpuiah hian a inlan thei a nih chuan tun hnai season hnih chhunga clay court tournament-a khelh lehna hmasa ber a ni dawn.

French Open inbuat-saih nana an hman ṭhin Madrid Open khel tur hian player langsar an inziak lut nasa. Federer bakah hian Rafael Nadal leh Novak Djokovic te pawh an tel dawn, hri lengin a tibuai lo a nih chuan a hmuhnawm hle ang.

Season hmasa khan Covid-19 vangin inelna a awm mumal thei lo. Federer hi a khup zai a nih bawk avangin a inkhel tlem zual, thla 13 chuang a chawlh hnuah thla hmasa khan Qatar Open-ah a lo kir a, a hnuaa khelh chhunzawm Dubai Open aṭang erawhin a inhnukdawk.

Grand Slam vawi 20 champion tawh hi tunah chuan a dam leh tawh a, clay court hi a hmun ngainat leh inkhelh thiamna ber hmun ni lo mah se inkhelh tam a mamawh. May 2-9 chhunga tournament khelh tur hi a tan hun ṭha a ni thei ang.

Swiss star Federer-a'n clay court chunga nomawi a chawi hnuhnung ber chu 2015 daih tawh kha a ni a, Istanbul khawpuia title a la hi a la chhunzawm leh lo. Madrid Open-ah thawnthu ziah danglam a tum dawn.

Kum 39 mi Federer hian kumin chhunga a thil tum pui ber chu Wimbledon title lak a ni dawn a, chumi hma erawh chuan hmabak a la ngah hle. Season hmasa khan hripui vangin All England Club-ah inelna awm lo mah se kuminah chuan neih ngei an tum.