City tan KDB a rinawm

Kevin de Bruyne chuan Manchester City tana a rinawmzia lantir nan contract thar a ziak. Belgium international leh Premier League hmahruaitu hian kum 2025 thleng daih inremna an ziak fel a ni.

Kum 29 mi KDB-a contract neih lai hian season hnih a la daih, mahse Man City nen hian inremna rei leh ṭha zawk an ziak. A contract a hmang zo a nih chuan a vanglai hun chu Etihad Stadium-ah a hmang zo dawn tihna a ni ang.

De Bruyne-a'n 2015 nipui laia Wolfsburg aṭanga City a zawm chinah Premier League nomawi pahnih, FA Cup bakah League Cup pali a chawi tawh - season kal laiah hian nomawi pali chawi thei dinhmunah an la ding mek.

Man City midfielder De Bruyne chuan, "Contract thar ziak tur hian harsatna a awm lo, club hian ka duh leh mamawh zawng zawng chu min pe a, a ṭha thei ang bera ka khelh theihna turin min pui bawk," tiin Pep Guardiola kaihhruaina hnuaiah a lungawi hle.

Season kal laiah De Bruyne hi hliam vangin a buai, harsatna karah pawh inelna hrang hrangah match 33 a khelh aṭangin goal riat a khung a, a ṭhiante khung tur vawi 16 a siamsak bawk.

KDB chuan sawi zawmin, "Season kan hman dan hi duhthusam a ni a, a hmawr kan bawk teuh tawh hle. A pawimawh ber erawh a tawp khar dan ṭha a ni," tiin nomawi chawi ngei a duh thu a sawi a, an chawi ngei pawh a rinawm.