French Open a chiang lo

Grand Slam pali zinga pakhat French Open chu a hun pangngaiah an khel thei lo mai thei, season hmasa khan Covid-19 vangin clay court inelna lian hi a khelh hun an lo sawn tawh bawk a ni.

Ruahman lawk dan chuan Paris khawpuiah May thla laihawl aṭangin French Open hi khelh tur a ni a, June 6 thleng a awh ang. Mahse, tun hnaiah hri leng a hluar thar leh a, hei hian Roland Garros a nghawng mai thei. French sports minister Roxana Maracineanu chuan, "French Tennis Federation nen inbiakna kan nei chhunzawm mek zel a, ram chhungah infiamna lian tham chu a hmuna entu awm a rem leh tawh rih lo.

"Hri leng a la reh theih loh avangin ruahman lawk sa pawh tih danglam a ngaih chang a awm ṭhin. Infiamna peng hrang hrang pawh him leh tluang taka a kal zel theihna turin kawng dap zel a ni," tiin a sawi.

Kar hmasa khan France ramah hian hripui kai mi 46,677 chuang an awm tawh, an zinga 304 chu an thi. Intensive care unit (ICU) ah mi 5,000 zet an awm avangin damdawi lam thiam tan chuan a luhai thlak hle ang tih a chiang.

Season hmasa pawh khan French Open hi May thlaa khelh tur kha September atan an sawn tawh a, a vawi 13 nan Rafael Nadal a champion. Kuminah hian clay court inelna dang chu neih tura tih mek a ni, French Open hi an khel a nih pawhin a hmunah entu an awm mumal thei lo ang.