Rinkai ber Manchester United?

Club sulhnu, player an neih dan leh season an hman dan thlir chuan Manchester United hi Europa League champion tura rinkai ber tia sawi ngam an ni a, chutihrualin Ole Gunnar Solskjaer hi champion pui tham mananger a ni chiah em, tih fiahna a ni dawn.

Man United hi Granada hmachhawn turin Spain ramah an zin lut a, club pahnih hi an intawn vawi khatna tur a ni dawn. Season hmasa khan La Liga lamah Granada hi pasarihna an ni a, kum 90 chhunga European football an khelhna hmasa ber a nih avangin an tan thil thar a ni zel.

International break-a awm hma khan United hi a zawnin match 14 ngawt an tlawm lo hman, an match hnuhnung berah Brighton & Hove Albion 2-1 a an hneh theih bawk avangin inrintawkna an nei sang viau.

Mahse, United hian hliam vangin Anthony Martial chu tun season atan an chhawr theih hmel tawh lo a, defender Eric Bailly chu hri leng a kai avangin Spain-ah a zin ve thei lo. Brighton laka hliam tuar Marcus Rashford dinhmun a la chiang lo bawk.

Granada hian quarterfinal kalkawngah Italian club ṭha Napoli an hneh thei, United manager Ole-a club hlui Molde an hneh bawk. Tottenham Hotspur striker hlui Roberto Soldado leh Jorge Molina te tlarhma lamah an inkawp dawn avangin Harry Maguire leh a ṭhiante tan inthlahdah a thiang lo ang.

Solskjaer kaihhruaina hnuaiah Man United hian beiseiawm tak taka chet an nei fo, mahse nomawi ni loin pahnihna dinhmun bak an la luah thei lo. Premier League lamah Manchester City umphak a harsa tawh dawn a, kuminah chuan Europa League hi an beisei theih awmchhun a ni.

Zanin inkhel dangah Ajax leh AS Roma an inhmachhawn dawn a, Italian club leh Dutch club ṭha inkhela chak zawk hian United te inkhela chawk zawk an hmachhawn leh ang - Solskjaer hi eng anga taka ṭha nge, a ni tih chu fiahin a awm chho dawn.