Badminton inelna neih hun an sawn

Badminton Asso-ciation of India (BAI) chuan April 18-25 chhunga neih tur All-India ranking tournament chu a hun pangngaiah neih theih a nih loh thu an puang, tournament hun an sawn chhan hi ram chhunga Covid-19 a hluar thar leh tak vang a ni.

Ruahman lawk dan chuan inelna hi Bengaluru-ah neih tur a ni a, ram chhunga player 2000 chuang an kal khawm ang. Mahse, tun hnaiah hri a darh nasa leh a, a bik takin Bengaluru leh Hyderabad-ah hri kai an tam zual.

BAI general secretary Ajay Kumar chuan, "Ram pum dinhmun kan thlir a, player mai bakah hna thawktu hrang hrangte hri leng laka kan him theih nan tournament khelh hun hi sawn a ngai.

"Tournament khelh hun tur hi sawi lawk theih a ni ta lo, amaherawhchu kan ṭhulh tihna a la ni lo. India ram dinhmun thlir chungin a hun tur chu sawi ṭhat leh a la ni ang," tiin a sawi.

All-India ranking tournament bakah hian May thla a neih tur junior leh sub-junior ranking tournament te pawh a hun pangngaiah an nei thei dawn lo.