Curry hoin GSW an chak leh ta

Tun hnaia match thum chhung an chak loh hnuah Golden State Warriors an tho chhuak leh ta. GSW hian nimin zing khan Stephen Curry-a point 41 neih hmangin team ṭha Milwaukee Bucks chu 122-121 in an hneh.

Kum 33 mi Curry hian second half bikah chauh pawh point 30 a nei thei, hun tawp hma minute li a la awmah point 10 zetin hniam zawk mah se hamrik hnuhnung ber a rik meuh chuan point khatin an sang zawk.

Golden State hian beisei angin season an hmang lo, an match hnuhnung pariatah vawi sarih ngawt an tlawm. Bucks an hneh leh tak avangin inrintawkna an neih belh ang; Western Conference-ah 10-na dinhmun luahin playoff beiseina an la nei zel.

NBA Most Valuable Player vawi hnih ni tawh Curry chuan, "Eng inkhel pawh ni se hnehna chan hi a pawimawh lai chu a ni. Hun hrehawm kan hman mek avangin hnehna chan hi a lawmawm a, hei hian team ṭha kan nihzia leh theihna sang tak nei kan ni tih a lantir," a ti.

Eastern Conference lama hmahruai mektu Philadelphia 76ers chuan Boston Celtics 106-96 a hnehin, table chung berah an dinhmun an sawhnghet. Inkhel dangah champion lai Los Angeles Lakers chuan Toronto Raptors lakah 110-101 in hnehna an chang ve leh ta a, player pawimawh LeBron James leh Anthony Davis awm loh kara hnehna chan hi chanchin lawmawm a ni ang.

An match hmasa lama Lakers hnehtu Los Angeles Clippers pawh khel ṭha chhunzawm zelin Portland Trail Blazers 133-116 in an hneh. Nimin zing NBA regular season inkhel dangah hian Atlanta Hawks, Denver Nuggets leh Memphis Grizzlies te pawhin hnehna an chang.