West Ham-ah Dawson a nghet dawn

Craig Dawson chuan loan hmanga a khelh mekna West Ham chu tun nipui bazar inhawn hunah a zawm nghet dawn. Premier League club hian Watford aṭangin defender hi 2023 thleng atan an la lut ang.

Kum 30 mi Dawson hian loan hmanga Hammers a zawm khan a ngheta awm theihna a tel. Nikum December thla khan West Ham tana a match hmasa ber a khel a, tun thlengin league match 15 a khel tawh a, inelna hrang hrangah match 19 aṭangin goal li a khungsak tawh.

Hammers manager David Moyes chuan, "Craig a khelh dan, a nungchang leh chezia zawng zawng hian a ngheta West Ham zawm hi a phu hle. Premier League-ah tawnhriat a nei ṭha tawh a, a rilru a fim bawk avangin kan tan chuan player ṭangkai leh pawimawh a ni," a ti.

Moyes kaihhruaina hnuaiah Hammers hian season duhawm an hmang mek. League match 30 an khelh aṭanga point 52 hmuin palina an ni mek a, pathumna Leicester City an phak lohna chu point li a ni.

West Ham hnuaiah hian Chelsea, Tottenham, Liverpool leh Everton an intlar tihna a ni. League match khelh hmabak pariat an la neihah thil a la danglam thei viau a, chutihrualin tun hnaia an kaltluan avangin season thar atan European football an beisei ngam.