Zaninah Europa League Quarterfinal

European football inelna sang pahnihna Europa League quarterfinal chu zanin hian khelh a ni dawn a, dar 12:30-ah inkhel pali a awm rual ṭhawt ang - April 15, Ningani zanah second leg khelh leh a ni ang.

Quarterfinal khel tur zingah Premier League club pahnih Manchester United leh Arsenal an awm. United hi Granada mualah an lenglut dawn a, Gunners erawhin Emirates Stadium-ah Slavia Prague an mikhual dawn a ni.

Team ṭha an tam a, nomawi chawi a harsa. Eng inelna pawh ni se 'champion' nih theih a hlu. Chutihrualin Europa League champion hi Champions League khelhna tur ticket neihna a nih avangin dahsan a harsa - champion nih erawh inelna hmachhawn club chuan an duh vek thhung.

Harh ngai Arsenal
Mikel Arteta-a'n team nghet leh ṭha tak din a tum a, bazar nan sum a neih hnem miau loh avangin a harsa. Chutihrualin man tam tak senga an lakluh sa leh player hlawh hnem tak tak pawh beisei angin a chhawr hleithei lo.

Beiseina sang tak nena an nghah Arteta chungah Arsenal fans an phun 'neuh neuh' ṭan a, zaninah an chak lo a nih phei chuan phun ri a ring zual ngei ang. Liverpool laka mualpho hlim hian an captain Pierre-Emerick Aubameyang aṭanga keeper Bernd Leno thlengin harh an ngai.

Premier League table aṭanga teh chuan Gunners hi EPL team vantlang chauh an ni a, table-ah 10-na an nih phak hram avangin an tan a sang pali zinga tel phak a beiseiawm tawh lo, an tan chuan Europa League chauh hi season tharah European football an beisei theihna a ni tawh.

Theihna a awm
Group stage chinah kha chuan Arsenal hian match ruk an khelhah hnehna an chang vek a, hetianga chak vek thei hi team 11 bak an la awm ngai lo - match tinah goal 3.33 khung ziah anga chawhrual theih an ni hial bawk.

Knockout stage chinah erawh a awlsam ta lo. Benfica 4-3 in an hneh a, last 16 inkhelah khualmuala an hneh Olympiakos chu an mualah ngam lo mah se inkhel pahnih belhkhawmah 3-2 in an tlang hram. A sulhnu en chuan Slavia Prague lakah rinkai zawk an ni a, mahse chesual thei erawh an ni ve tho.

Czech Republic champion hian league lama Arsenal tluk loh Leicester City 2-0 in an hneh thei a, season duhawm hmangtu Rangers pawh an mualah 2-0 in an luhchhuah thei bawk - Gunners hi an huphurh tehchiam bik lo ang tih chu a chiang.

Hliam leh hrem
Arsenal lamin defender pawimawh David Luiz an chhawr theih a beiseiawm loh a, match hnuhnung bera hliam tur Kieran Tierney dinhmun a chiang lo bawk. Emile Smith Rowe, Bukayo Saka leh Granit Xhaka te erawhin training a zawm leh tawh, 100% chuan an la inpeih lo mai thei.

Swiss international Xhaka hian Reds a hmachhawn lo a, a awm loh karah Gunners midfield a nghet tawk lo tih a lang. Arsene Wenger hunlai aṭang tawha an chhawr rim Xhaka hi a inlan thei a nih chuan Thomas Partey ṭangkaina pawh a zual zawkin a rinawm.

Prague pawhin an player pawimawh Ondrej Kudela an chhawr thei dawn lo. Rangers nen an inhmachhawn ṭumin midfielder Glen Kamara lakah a che mawi lo a, chi inthliarna lam hawia dan a bawhchhiat vangin UEFA chuan a hrem a ni.