Italy-in Euro thlen a huam

Italy sorkar chuan 2020 European Championship thlen an inhuam a, tun hnai khan Italian football federation (FIGC) chuan an ram sorkar rem tihnain Rome khawpuia Olympic Stadium-ah a inkhelh theih tur thu an sawi.

Covid-19 vangin nikum khan Euro neih theih a ni lo a, kum khata sawn tlai a ni. Europe football thuneitu sang UEFA chuan Euro thleng tur ram 12 te chu April thlatir lamah hian tournament thlen dan tura an ruahmanna thehlut turin an ti.

FIGC president Gabriele Gravina chuan, "Health minister Roberto Speranza hnen aṭanga thu kan dawn dan chuan, June thlaa neih tur European Championship atan Rome khawpuia awm Olympic Stadium chu a hawn theih dawn.

"Stadium chhunga fans lut thei zat tur erawh tih chian theih a la ni lo. Sorkar leh UEFA lam nen inbiak pawh reng a ni a, harsatna karah pawh thil a ṭha thei ang bera thlen theih ngei kan beisei," a ti.

Euro 2020 hi June 11-ah khelh ṭan a ni dawn a, match hmasa ber atan Italy leh Turkey an inkhel ang. Rome khawpui hian match hmasa ber bakah hian quarterfinal thleng turin ruahmanna an siam.

Kum danga an tih ṭhin loh danin Euro 2020 hi chu ram hrang hrang 12 zetin an thleng dawn a, Italy bakah hian inelna thleng tur zinga mi Scotland pawhin an rama tournament lian hi a hmuna entu awm chungin an thleng thei dawn tih an sawi.

Glasgow khawpuia awm Hampden Park-ah hian Group D match pathum bakah last 16 match pakhat an khel ang. Scottish Football Association chuan Nilaini khan UEFA hnenah Euro 2020 thlen dan tur chungchanga an ruahmanna hi an thlen fel tawh.