Tualchhung Cricket Chhinga Veng chak awlsam

Mahuma Memorial 1st Division Screening Tournament khelh kal laiah nimin khan Chhinga Veng chuan Zarkawt Lords lakah wicket liin hnehna an chang a, match ruk an khelh china vawi nga an chakna niin table chung berah an awm.

Suaka Cricket Ground, Sihhmuia inkhelah Zarkawt Lords hi ṭhum vawra vannei zawk an ni a, vuak hmasak an thlang. Mahse, Lords hian an beisei leh duh angin run an siam hnem thei lo.

Lalrinfela'n run 36 a vaw chhuak a, ani bakah hian run 31 siamtu C. Vanlalṭhafamkima bak chu che ṭha an nei lo. Chhinga Veng ball vawm thiam Souvick Ghosh an ngam lo, ani hian over 10 a vawm aṭanga wicket li lain run 18 chauh a pe.

Player of The Match Ghosh chet ṭhat vangin Zarkawt team hi over 40.3 lekah run 138 chauh siamin an thi kim. 3C lam tan target a sang lo, tawnhriat nei ṭha K. Vanlalruata'n ball 87 a hmachhawn aṭanga run 76 siamin a thi lo a, nuamsa takin a team a chakpui.

Chhinga Veng hian over 30.3 chhungin an target an umphak a, mi paruk an thi. Table chung ber an luah leh tak avangin final lut turin an dinhmun a sawhnghet nghal zel.

Chanmarians, Ram-hlun Venglai leh Kulikawn te chu vawi li chak tawh an ni bawk, anni pathum hian Chhinga Veng aiin match khatin a khel tlem thung. Inelna neih laiah hian hneh lo nei loa kal tluang thei an awm tawh lo.

Vawiin hian a hmun ngaiah inkhel pakhat a awm leh dawn, vawi hnih chak tawh Gorkha leh chak ni hmel la hmu lo Armed Veng an inhmachhawn ang.