Hun harsa tak a ni - Rossi

Valentino Rossi chuan MotoGP a luhchilh chinah hun harsa a tawn fo thu a sawi a, tun season-a a bul ṭan dan chu kum dang zawng aiin a chhe zual hle nia a hriat thu a sawi bawk.

Season bul ṭanna Qatar Grand Prix-ah Rossi hian palina aṭangin bul a ṭan phak hram, inelna hnuhnung zawkah phei chuan 16-na aṭangin a tlan ṭan phak chauh - qualifying a tlan chhiat ber ṭum a tawng.

Petronas Yamaha rider Rossi chuan, "Zep thu a awm lo, midang hnung aṭanga tlan ṭan hi chu a ṭha thei lo. A bik takin lap hmasa lamah ka tlan ṭha lo zual a, a tawp lama ṭan vak hi sawt mah se a bul ṭan fuh loh chuan a harsa tawh ṭhin.

"Inelna kan neih leh hun atan nasa takin kan inbuatsaih chhunzawm a, tyre thlan chungchangah pawh kan tih fuh tawh ngei ka beisei. Hmasawnna tur lai kan la ngah hle, vawi khata siamṭhat nghal vek theih erawh a ni lo ang," a ti.

MotoGP season kal laiah inelna vawi hnih an nei tawh, a pathumna atan April 18 hian Algarve International Circuit, Portimao-ah Portuguese Grand Prix an tlan leh ang.