Germany-ah sawiselna nen City an chak hram

Manchester City chuan Thawhlehni zan khan Champions League quarterfinal first leg-ah Borussia Dortmund chu 2-1 in an hneh a, Pep Guardiola hnuaia a vawi khat nan semifinal khelh an beisei chhunzawm zel.

City tan Kevin de Bruyne leh Phil Foden-ten goal khat ve ve an khung a, Dortmund tana Marco Reus-a goal khung chuan German club tan semifinal a la beisei theih tih a pholang. Dortmund rawlthar duhawm Jude Bellingham chuan City keeper Ederson a bum hnuah goal khung mah se Bellingham foul vangin referee-in a pawmsak lo a, Dortmund tan chuan thinrimna tham a tling.

April 14 zanah team pahnih hian quarterfinal second leg an khel leh dawn a, Dortmund-in away goal an neih miau avangin beisei an la nei ang.

A goal hma
Etihad Stadium-a inkhelah City-in goal khung tura an nghah rei a ngai lo. Minute 19-na lekah De Bruyne chuan Riyad Mahrez hnen aṭanga a ball hmuh chu hnai set sawt aṭangin a pet goal a, Dortmund an hawihai.

City-in ball an chang tam a, inkhel pawh an thunun - mahse, minute 19-na leka goal hmahruai an khung chungin goal dang erawh an khung lawk thei lo a, Dortmund an hlauhawm ve reng bawk. German club hian tun hnaiah result ṭha nei lo mah se City goal nawr turin tunlai football khawvela rawlthar ngaihven hlawh ber tih ngam Erling Braut Haaland, Bellingham leh Reus-te an neih avangin an zam bik lo.

Hun tawp nan minute ruk chauh a awm tawh tihah German club hian an duh tak an hlawh chhuak ta nge nge a, Resu chuan Haaland-a hnen aṭanga a ball hmuh ṭha tak chu si phurh sut nan tawih zetin a khung.

A la tawp lo
Dortmund goal khung hun en chuan draw result nen team pahnih hi an ṭin mai dawn niin a lang hman a, mahse, City an ni miau a, Pep-a nauten a tawp thlengin an tha an thlah lo - semifinal an thlir tlat.

Minute 90-naah rawlthar sawi hlawh Foden a inlar ta nge nge a, chakna goal-a khung. Khel ṭha em em mai De Bruyne hnen aṭanga a ball hmuh chu lkay Gundogan-a'n Foden tan a chhawpsak a, English midfielder hian goal-a chantir turin harsatna a tawk lo.

Kum 20 mi Foden hian tun season inelna hrang hrangah City tan match 39 khelin goal 12-a khung tling ta a, assist vawi kua a nei bawk - City legend David Silva-a chhuah dawna Pep-a'n Spanish playmaker thlak tura Foden an neih thu a sawi kha a dikzia a lan chhunzawm zel.

City hian second leg khel tura Dortmund an lenchilh leh hmain Leeds United chu April 10 zan hian Premier League-ah an hmachhawn leh dawn a, game hautak tia sawi tur a nih dawn loh avangin inrintawkna nen Germany an pan thei ang.

I dawn chiang lo
Etiha Stadium-ah Dortmund an khel chhe lo a, khualmuala goal hnih an khung loh chhanah puh tur an duh a nih chuan Romanian referee Ovidiu Hategan an kawh rawn thei ang.

City-in 1-0 a hma an hruai laiin Bellingham chuan Dortmund tan si phurh a sut a, mahse, English forward goal khung hi foul vangin pawm a ni lo. Kum 17 mi Bellingham hian Ederson tihsual nangchingin ball-a um lut a, City keeper Ederson chuan ball petchhuah tumin a ke a lo pet chhuak.

Ederson-a ke zawk hian Bellingham-a ke a va tawk fuh zuai niin a lang a, English forward hi a foul lo - mahse, Ederson tlan pela goal ruaka a khung hmain referee-in hamrik a ham hman a, video assistant referee (VAR) hmanga ennawn theih pawh a ni lo.

Bellingham chuan, "Fair takin ball kha ka hlawh chhuakah ka ngai a, tun ang hun, camera tam takin inkhel a record laia, ka goal khung hnua check theih hun tur nghak loa thutlukna an siam mai kha mak ka ti," tiin a lawm lo hle.

A hming Haaland
City nena sawizawm Haaland chu player langsar ber ni lo mah se European football-ah eng team tan pawha harsatna siam turin a ṭha tawk tih a lang a, City ṭantute chil a ti put lehzual ang.

Norwegian striker hian first half-ah Bellingham tan chance duhawm a siamsak a, second half ṭantira a chance neih Ederson-a'n ṭha taka a dan tak insiam tura a tlan chakna leh tharum hmanga City defender Ruben Dias a nghaisak dante kha hmuhnawm a tling.

Hei mai a ni lo - tun season inelna hrang hranga match 33-a khelh aṭanga goal 33 khung thei striker hian assist pawh a thiam tih lantirin Reus goal khung tur ṭha zetin a siamsak bawk. Hetichung hian kum 20 mi striker hi a khelh ṭhat loh zan anga ngaih a ni a, a khelh ṭhata a hlauhawm turzia chu City-in an hrethiam ang - inkhel a la tawp lo.

City an vanduai?
Manchester City-in an phu ang ngeiin hnehna an chang a, Bellingham-a goal khung ngei tura lang pawm a nih lohnain an result ṭha hliahkhuh deuh mah se an vanduaina an thlir duh a nih chuan sawi tur an nei ve tho.

City-in goal khat an khung hnuah Emre Can chuan De Bruyne freekick aṭanga ball kal chu 'khen' a tumna lamah City midfielder Rodri-a hmaiah a kheng fuh niin a lang a, referee-in City hi penalty a pe. Mahse, mual sira video-a a ennawn hnuah referee-in penalty turah a ngai lo a, a thutlukna a sut.

Kevin de Bruyne chuan, "Kha aia tam zawk kha khung thei kan ni a, mahse, 1-1 a nih kha chuan a harsa lehzual tawh a ni. Goal kan chhuah hnua kan chet dan en khan a lawmawm ka ti a, result ṭha a ni.

"2-1 chu a him lo tih kan hria a, mahse, hmahruaitu ni chungin kan zin dawn a ni," a ti a, an beisei zat goal khung lo mah se chak zawk nih chu a hlut tho thu a sawi - Dortmund hian City an mikhual hmain April 10 zanah league match khel turin VfB Stuggart an lenchilh ang.