Federer-a'n sum a lalut hnem ber

Infiammi zingah Roger Federer chu tun hnai thla 12 chhunga sum lalut hnem ber a ni a, American magazine Forbes-in a tarlan dan chuan nikum lama pakhatna dinhmun luah tawhtu Lionel Messi chu pathumnaah awmin, pahnihnaah Cristiano Ronaldo a awm thung.

Grand Slam vawi 20 champion tawh Federer hian pound maktaduai 86.2 a lalut a, a sum lakluh zinga pound makatduai 81 lai chu sumdawnna lam aṭanga a hmuh a ni.

Federer dawtah hian footballer pathum - Cristiano Ronaldo (£85m), Messi (£84m) leh Neymar (£77.5m) te an awm, American basketball player LeBron James (£71.5m) chu panganaah a awm bawk.

Tennis khel thiam hming thang Federer-a'n Grand Slam nomawi a chawi hnuhnung ber chu 2018 Australian Open daih tawh kha a ni a, inkhelhna lawmman aṭanga a sum hmuh chu sang tak a ni thei lo.

Mahse, kum 38 mi Federer hi mite ngaihsan rawn a ni a, sumdawnna lamah a buk a rit reng. Japanese thawmhnaw siamtu Uniqlo, Switzerland rama sum peipunna lian Credit Suisse leh German car changkang siamtu Mercedes-Benz te chu a thawhpui lian zual an ni.

Forbes hian kum 1990 aṭang khan infiammi sum lalut hnem hi a tarlang ṭhin a, tennis player zingah Federer hi pakhatna ni thei hmasa ber a ni. Kum 30 chhung hian pakhatna ni thei player pakuana a ni chiah bawk.

Pahnihna dinhmun luahtu Ronaldo sum hmuhna langsar chu Nike, Altice, Herbalife leh amah puala brand a neih CR7 te an ni a. Messi pawhin Adidas, MasterCard leh PepsiCo aṭangin sum a huilut hnem ve bawk a ni.

Covid-19 vangin hun rei tak inkhelh theih a ni tawh lo a, hripui leng hi footballer-te sum lakluh tlak hniam chhan langsar a ni. Forbes senior editor Kurt Badenhausen chuan, "Messi leh Ronaldo sum lakluh tlakhniam chhan chu coronavirus vang a ni tih a hriat.

"Roger Federer erawh inkhel thei bik lo mah se sumdawngtu lam aṭang chuan duhthlan tur ṭha tak a ni thung si," a ti. June thla aṭang hian football an khel ṭan leh tawh dawn a, hri leng hian season thar a tibuai chhunzawm lo a nih chuan Messi leh Ronaldo te sum hmuh hi a san leh a rinawm.

Sum lalut hnem zual 100 an tarlan zingah India criket captain Virat Kohli chu 66-naah a awm, cricketer zinga lang phak awmchhun Kohli hi nikum khan 100-naah awm mah se player 30 chuang khumin a invawrh sang hle.

India fapa rangkachak hian a inkhelh thiam bakah mite ngaihsan a nihna chu a hlawkpui, a sum dinhmun san theih chhan chu Wrogn leh One8 (Puma) aṭanga a hmuhte an ni.

Kum 31 mi Kohli-a'n sum a lakluh zawng zawng chu dollar maktaduai 24 a ni a, a sum hmuh zinga dollar maktaduai hnih chu crikcet a khelh lawmman aṭanga a hmuh a ni; a dang zawng chu sumdawnna aṭanga a hmuh a ni thung.

Mipa 98 zingah hmeichhe pahnih hming a lang, tennis player pahnih Naomi Osaka (29-na) leh Serena Williams (33-na) te an ni. 2016 khan Serena leh Maria Sharapova te an lang dun tawh, a hnu lamah kumin hi hmeichhe player pahnih an lan lehna hmasa a ni.

Kar hmasa mai khan Frobes chuan hmeichhe player bik sum lalut hnem hi a lo tarlang tawh a, a zawna kum li chhung a chung bera awm thei Serena chu Osaka hian a rawn khum, Japanese nula chungnunna hi pound maktaduai 1.15 chauh a ni - an inthlau tam lo hle.

A pumpui thlir chuan basketball player (35) an tam ber a, American football player 31 an lang bawk. Footballer pakua langin, tennis player (6), boxing leh mixed martial arts (5 ve ve) an awm bawk.