5 Star = Liverpool; Nomawi = ?
Liverpool-in Premier League champion an phu tih an pholan chhunzawm zel a, Zirtawpni zan khan harsatna nei loin Huddersfield chu 5-0 ngawta sawpin table chung berah an awm leh ta.
Reds tan Sadio Mane leh Mohamed Salah te chuan goal hnih ve ve an khung a, Naby Keita chuan goal khat a khung bawk - Premier League aṭanga tla chiang tawh Huddersfield-in a chhanna tur an nei lo. Reds an thiam viau chungin an champion leh champion loh erawh Manchester City kutah a la innghat cheu a, City hian nizan khan Burnley lenchilhin an result kan hre hman lo.
Pep Guardiola enkawl team hian hnehna an chang a nih chuan Liverpool tlanpelin pakhatnaah an chho lehnghal dawn a, he thuziak i chhiar meuh chuan table a danglam leh tawh hial mai thei.
Liverpool an thiam
Anfield-ah mualneituin goal khung turin hun an mamawh rei lo hle. Second 15-na lekah Keita chuan Premier League-a Liverpool goal rang ber chu Salah siamsak hmangin a khung a, tun season-a inelna hrang hranga Reds goal 100-na a ni nghal.
Reds-in goal an khung hma avangin champion tum club hian pressure nei loin an khelh theih phah a, minute 23-naah Mane chuan a chhunzawm ve lehnghal - he goal luh danah assist tu Andrew Robertson cross ṭha zet chu sawi hmaih theih a ni lo.
Mane-a'n goal a khung a, Salah tan ngawih reng a mawi lo. Egyptian forward hian first half hun pek belhah an goal thumna a rawn khung lehnghal a, Liverpool an hmuhnawm tulh tulh. Huddersfield hian vawi hnih ngawt chance ṭha an nei ve a, mahse an hun neih hi Juninho Bacuna leh Karlan Grant-te chuan engmah lo maiah an chantir.
Top scorer inelna
Anfield-a second half inkhel chu chungnung zawk nih inchuha team pahnih inelna a ni tawh lo a, Liverpool player pahnih Mane leh Salah te tan Golden Boot dawng tura inelna a ni tawh zawk!
Salah leh Keita ten an hun ṭha neih an chhawr loh hnuah tun season-a 'form' tak mai Mane chuan an goal lina a rawn khung zui a, minute 66-naa a goal khung hi Jordan Henderson siamsak a ni. Mane-a'n goal a khung hian tun season league-a goal 20 a khungna chiah a ni a, Salah nihrualin Premier League-ah an goal khung zat inangin top scorer an ni - inelna hrang hrangah goal 24 a khung tawh.
Mahse, Mane nena intluk reng Salah-a'n a duh lo - hun tawp nan minute sarih chiah a awm tawh tihah a goal hnihna a khung ve leh a, league-a a goal 21-na niin Premier League top scorer a ni mek.
Vanduai Liverpool?
2003-04 season khan Arsenal chuan tlawm miah loin Premier League nomawi an chawi a, he team hi tun thlenga sawi hlawh niin 'Invincibles' (hneh theih loh) tih hminglem pek an ni hial.
Mahse, Arsene Wenger-a enkawl kha team ropui khan point 90 an hlawh chhuak a, point 91 nei tawhtu tun season-a Liverpool team ai hian point khatin an nei tlem zawk tihna a ni. Manchester United ropui vanglai an sawi apiangin 1998-99 season-a treble champion an nih kha sawi a ni fo ṭhin a, mahse kha team khan Premier League-ah tun season-a Liverpool point hmuh zat aiin point 12-in an hmu tlem zawk!
Premier League-ah eng team mahin point 91 hmu tling chungin nomawi an la chawi lo ngai lo a, mahse Liverpool hi chutiang dinhmuna ding theiah chuan an awm mek.
An ṭha
Reds defender Andy Robertson-a'n Mane leh Salah tan siamsakin assist vawi 11 a nei ta. Scottish left back hi Leighton Baines (2010-11) leh Andy Hinchcliffe (1994-95) nihrualin Premier League season khata defender assist nei hnem ber a ni.
Salah leh Mane-a'n goal 20 an khung tlin ve ve avangin Luis Suarez leh Daniel Sturridge (2013-14) hnua Liverpool-in season khata goal 20 khung tling thei player pahnih an neih hmasak ber a ni zui. Salah-a'n Liverpool legend te hnung zui zelin Robbie Fowler (1994-95 & 1995-96) leh Luis Suarez (2012-13 & 2013-14) hnua season zawna league-a goal 20 khung tling thei Liverpool player pathumna a ni a, match 100-ah goal 69 khungin assist 29 a nei.
Liverpool tan Roberto Firmino chu hliam vangin inlan thei lo mah se Nilaini zan Champions League semifinal-a Barcelona an lenchilh hunah erawh a inlan thei dawn a, April 2018 hnua a vawi khatn nan Alex Oxlade-Chamberlain chu a inlan bawk.