Goal 600 khungtu Ronaldo

Cristiano Ronaldo chuan player ropui chungchuang bik a nih zia lantir nan Inter Milan lakah goal a khung a, Portuguese forward hian club tan goal 600 a khung tling ta.

Inrinni zan San Siro-a Serie A inkhelah Inter Milan hian Radja Nainggolan hmangin goal khung mah se Italian champion tan Ronaldo chuan an siphurh a sut a, 1-1 a inhnehtawkin point khat ve ve in an insem.

Kum 34 mi Ronaldo hian club career bul a ṭanna Sporting Lisbon tan goal nga a khung hnuah Manchester United tan goal 118 khung lehin - a vanglai hun a hmanna Real Madrid-ah goal 450 tehmeuh a khung.

Juventus a pan hnuah pawh goal khung a bansan thei chuang lo. Turin club tan hian a season khatna hmang mekin goal 27 a tlin leh der tawh, Italian club tan hian season tawp hmain a la khung belh ngei pawh a rinawm.

Inkhel dangah AS Roma chuan Cagliari 3-0 a sawpin Serie A table-ah palina dinhmun an luah a, Claudio Ranieri naute hian an chunga awm AC Milan chu point hniha pelin an nek chhuak.

Mahse, Milan hian nizan khan Torino an lenchilh a, hnehna an chang a nih chuan palina an ni leh ang - a sang pali chinin season tharah Champions League an khel dawn a ni.