Tuichangral an chak ve ta

Suzuki Gixxer Pro Volleyball League 2019-ah champion tura rinkai zinga mi Tuichangralin beisei angin bul an ṭan fuh lo. Zirtawpni zan inkhelah erawh Aizawl khaw pawn team hian Durtlang North chu 15-12, 15-9, 15-7, 15-13, 10-15 (4-1) a hnehin tun PVL bika a vawi khat nan hnehna an chang.

Chawnpui Sports Centre-a inkhelah Tuichangral tan Jaideep Sandu chuan point 17 thawk chhuakin tha thawh hnem viau mah se, ṭum saih vuak sual a nei. Point 14 a hmuh aṭanga vawi hnih chiah tihsual nei Lalhmunmawia (Tuichangral) chu RS Traders Player of the Night atan thlan a ni.

April 30, Thawhlehni zanah Durtlang North hian Hunthar an hmachhawn leh dawn a, champion lai Hunthar hi semifinal khel lo thut thei an la nih avangin a awlsam lo ang. May 1, Nilaini zanah Tuichangral leh Thutak Nunpuitu Team (TNT) an inkhel ve thung ang.

Inrinni zan inkhelah Chhinga Veng Spikers chuan champion an tum zia lantir nawn lehin Anastasia Electric Veng chu 16-14, 16-14, 13-15, 15-13, 9-15 (3-2) in an hneh a, Spikers thiampuipa Mandeep Singh chu RS Traders Player of the Night atan thlan a ni.

Chhinga Veng hian PVL match thum an khelh tawhah hnehna an la chang vek a, anni chiah hi tlawm nei loa kaltluang thei awmchhun an ni. Anastasia erawh an vawi khat chak lohna niin pathumnaah an lungawi rih a ṭul.