French Cup champion Rennes PSG tan Neymar goal a tawk lo
Rennes chuan team ṭha leh ropui zawk Paris St-Germain hnehin kum 1971 hnua a vawi khat nan French Cup champion an ni. Club pahnih te 2-2 a an inhnehtawk hnuin penalty shootout-ah Rennes hian 6-5 in hnehna an chang.
Inkhel chu
Ligue 1 champion PSG hian tun hnai season li chhung chu French Cup hi an la vek. Inrinni zan final inkhelah pawh Dani Alves-a'n goal hmahruai a khung hnuah January thla hnua inkhel bul ṭan lehtu Neymar chuan mawi zeta 'chip' lutin minute 21-na lekah 2-0 in hma an hruai - Paris club hian harsa lo takin nomawi an chawi a rinawm hman hle.
Amaherawhchu, PSG defender Presnel Kimpembe-a'n chawlhlawk hma deuhin anmahni lamah a ti lut a, defender Edson Andre Sitoe chuan an siphurh sut zawhna a khung bawk - minute 90 chhungin goal dang a lut zui tawh lo.
Extra time khelh a ni a, Kylian Mbappe-a'n chakna goal khung theihna hun ṭha nei mah se goal ban a pet per dawp. Hun tawp hma deuhin France international hi Damien Da Silva laka a foul vangin hnawhchhuah a ni.
Penalty hlah
Goal a luh mai loh avangin penalty an pet dawn niin a lang a, hun tawp hma chiahin rawlthar Moussa Diaby thlak turin Christopher Nkunku dahluh a ni, Nipui laia Rennes zawm tura an sawi Nkunku hi penalty pet tura dah luh a ni tih a chiang.
Player 11 ten penalty an pet luh hnuah PSG tana rawn ding chhuak Nkunku chuan cross bar chungah thlawh chhuakin a vawi thum nan Rennes lamin French Cup an chawi theih phah. PSG erawh 2011 hnu lama cup final bikah a vawi khat nan an chak lo.
Eng nge an sawi?
Ligue 1 champion ni mah se French Cup leh Champions League-ah an hlawhtling lo a, PSG manager Thomas Tuchel chunga zawhna langsar awm nghal chu a hna ngai a thawk chhunzawm dawn em tih a ni.
German manager Tuchel chuan, "Dik takain PSG enkawl chhunzawm ka duh," a ti. Tuchel hian goal hnih an neih sa an hum zo lo leh, vanduai thlak taka penalty an hlah chu pawi a tih thu a sawi chhuak.
Rennes manager Julien Stephan chuan, "Player zawng zawngin theihtawp an chhuah a, rinkai lo zawk ni mah ila kan champion thei a ni tih beiseina kan neih miau avangin hlawhtlinna kan chang," tiin a zawna French Cup vawi nga champion tawh an hneh chungchang a sawi.