King Leo hoin Spain-ah Barca-in ro an rel

Inrinni zan khan Barcelona chuan 1-0 in Levante an hneh a, a vawi 26 nan La Liga champion an ni leh ta - Barca tana goal khungtu chu tu dang ni loin Lionel Messi bawk a ni.

La Liga-ah match thum khelh tur la awm mah se Barca-in an thiam fal zia pholangin an hmabak match thum chu engmah lo maiah an chantir a, tun hnai kum nga chhunga a vawi li nan an champion. Barca hian first half-ah goal khung lo mah se second half-ah bench aṭanga luhtir Messi chuan he inkhela goal awmchhun hi a khung a, 1-0 a a team chakpuiin nomawi a chawipui leh ta a ni.

Inrinni zana Barcelona inlan hmain Atletico Madrid chuan 1-0 in Real Valladolid hneh mah se Barca champion tur dal nan a tawk zo lo a, kut ruakin season an khar dawn ta.

Hello treble?
Barcelona-in La Liga nomawi an chawi ta phawt a, treble champion ni tura an la bak chu Champions League leh Copa del Rey a ni.

Catalan club-in Copa del Rey-ah final an lut tawh a, May 25-ah Valencia nen champion an inchuh ang. Champions League-ah semifinal an lut tawh bawk a, Nilaini zanah Liverpool an mikhual dawn. Liverpool tan Barca-in La Liga nomawi an chawi lai hi thlir nuam a ni lo ang. Reds tan league ngaihtuah ran chunga semifinal khelh a ngaih laiin Barca erawhin enghelh nei loin hahdam takin an khel ang.

Catalan club-in Champions League semifinal an khelh hnuhnung ber chu 2015 khan a ni a, hemi ṭum hian treble champion an ni - hei chiah hi an ngaihtuah leh tawh dawn tih a chiang.

Danglamna Messi
Barcelona tan Messi-a'n inkhel bul a ṭan lo chungin Luis Suarez, Philippe Coutinho leh Ousmane Dembele te tlarhmaah an la inkawp thei a, huphurhawm tak an ni.

Mahse, Messi tel lo chuan player ṭha rual hian goal an khung thei lo a, Coutinho thlaka Messi luh hnuah Barca an nung thar a, an beisei ber goal pawh nghah rei a ngai lo. Messi hian minute 62-naah he inkhela goal awmchhun hi a khung - Arturo Vidal ball tauh chu um lutin Levante defender pahnih a bum a, vawi tam dang tawhtu Levante keeper Aitor Fernandez dan hman lohin a pet lut.

Kum 31 mi Messi hian league match 32-a khelhah goal 34 a khung tling ta a, inelna hrang hrangah match 45 khelin goal 46 a khung tawh - Barca danglamna a ni.

Messi dang rawh u
Barcelona-in Levante lakah an ṭhat dan berin an khel lo tih a chiang a, mikhual team tan Jose Luis Morales chuan holam takin a hlah a, Enis Bardhi chuan woodwork a tih per bawk.

Mahse, Barca-in club dang neih ang ni lo pakhat an nei a, a hming Messi a ni. Levante-in Messi luh hma zawngin goal an chhuah lo a, tlarhnung pawh an rem khawm fuh viau niin a lang. Messi meuh erawh an dang zo ta ngang lo a, reh pawp tur a hmuh hnuah Argentine forward-in goal a khung - Jurgen Klopp-a'n he inkhel hi a en a nih phawt chuan Messi che vel kha hmuhnawm a tih a rinawm loh.

Mahse, he inkhelin formula holam tak Liverpool tana a chhawpchhuah chu, "Messi dang ula, Barca-in dang a ni mai," tih hi a ni - mahse he formula-in a ken tel 'Messi dan' hi a harsa miau si.

A la tawp lo
Barcelona boss Ernesto Valverde chuan, "Kan hlim em em a, mahse kan hmaah hian chona inchhawp a la awm a ni," a ti a, Liverpool nena Champions League semifinal an khelh tur a thlir nghal.

Spanish manager chuan Messi chungchang sawi nghalin, "Nilainiah inkhel kan neih dawn avangin Messi khan minute 45 tal a khelh a ngai tih a chiang reng a ni," tiin a captain chu Liverpool tana a buatsaih thu a sawi. "Leo hi chuan khawiah pawh goal a khung mai a ni," a ti zui a, Argentine forward hmangin Reds a tih ṭhaih - Messi hian La Liga nomawi ringawt pawh vawi 10 a chawina a ni ta.

Barca tan La Liga-a vawi 26 an champion-na a ni a, tun hmaa an thlauh em em ṭhin Real Madrid (33) an hnaih zel - tun hnai season ngaa vawi li an champion theih avangin Real tan Barca ngaihthah reng a rem lo ang.