India aiawha silai kap tur Lallawmzuali Zadeng

Silai kap thiam Lallawmzuali Zadeng chu India aiawhin a feh chhuak dawn. Zualbawihi hi Czech Republic leh Germany-ahte 10m Air Rifle competition-ah a inlan dawn a. Mizo nula silai kap thiam zingah India aiawh hmasa ber tur a ni.

April 30 aṭang hian 50th Grand Prix of Liberation chu Czech khawpui pakhat Pilsen-ah neih a ni dawn a, hei hi inelna a hmachhawn hmasak zawk tur a ni ang. International Shooting Competitions of Hannover (ISCH) chu May 5-15 chhunga neih chhunzawm tur a ni a, Mizo nula telna India team hian Germany an pan nghal ang.

India aṭang hian shooter 24 leh official pathum an kal dawn a, inelna hi invitation tournament niin India coach Deepak Panday-a'n tun hma lama a lo enkawl tawh Zualbawihi hi a team zinga tel turin a thlang. Inelna pakhatah hian vawi hnih ve ve an kap zel ang.

Venghlui nula Zualbawihi hian 2006-a Mizoram Rifle Association (MRA) ten Air Rifle Shooting Competition a buatsaih aṭangin silai a kap ṭan a, state chhunga hlawhtlinna a chan hnuah North East Level-ah pawh gold medal pahnih, silver medal pakhat leh bronze medal pahnih a la tawh a ni.