Kai Havertz-a'n Bundesliga record a siam

Bayer Leverkusen-in Zirtawpni zanah SC Freiburg chu khualmualah 1-0 in an hneh a, Kai Havertz-a'n goal awmchhun a khung.  Kum 20 mi Havertz hian Bundesliga-ah season li chhungin goal 35 a khung a, kum 21 tlin hmaa goal 35 khung thei hmasa ber a ni.

Bayer Leverkusen hian hnehna an chan avangin point 56 hmuin pathumnaah an invawrh chho a, nizan lama Borussia Monchengladbach leh Union Berlin inkhel leh zanin dar 12:00-a FC Cologne leh RB Leipzig te inhmachhawn tur result-in table hi a la ti danglam thei ang.

Bayer Leverkusen-in Bundesliga ṭan a nih leh hnuah match li an khelhah vawi thum an chak a, heng match thumah Kai Havertz hian goal a khung vek.

Havertz hian Werder Bremen leh Champions League khel tura an elpui Gladbach an hneh ṭumin goal hnih a khung ve ve a, tuna Freiburg lama goal a khung nen tun season-ah goal 11 a 

khung tawh.

German attacking midfielder Havertz hi Aachen hmar lama khaw pakhatah Mariadorf-ah June 11, 1999  khan a piang a, a pu vangin football lamah a kal a, an chhungkua hi football tui chhungkua an ni.

Havertz-a pu Richard hi Alemannia Mariadorf-ah club chairman a ni a, kum li mi a nih aṭangin Alemannia Mariadorf youth team hi a zawm der tawh a. Kum 2020 khan Havertz hian Leverkusen a zawm a, kum 11 mi chauh a la ni.

Havertz hian theihna a nei sang bawk a, tunah hian kum 20 mi chauh niin senior team tan a khel der tawh a, Germany tan pawh vawi sarih a khel tawh. Europe club lianin talent nei ṭha Havertz hi an en thla tawh a, feet ruk leh inches hnih zeta sang a nih bawk avangin hmabak a nei êng hle.

Kum 2019 a tawp khan season chanve khelh chhoh a ni a, Bundesliga-a hmahruaitu chu RB Leipzig an ni. Tunah erawh Leipzig pa tuaina a lang chho a, match hnuhnung pathum aṭangin point nga chauh an hlawhchhuah avangin champion a beiseiawm tawh lo.

Julian Nagelsmann hote tan Champions League khel tur pawhin beih fe a ngai dawn a, zanina an hmachhawn tur FC Cologne lakah chetsual a thiang lo. Leipzig tan Timo Werner-a'n league-ah goal 24 a khung tawh a, amaherawhchu Germany international striker hian chet ṭhat ṭum a nei - player ṭha zawk ni tur chuan tun aia a rintlak a ṭul ang.