Stadium tharah a vawi khat nan Spurs chak lo

Tottenham Hotspur chuan an stadium tharah a vawi khat nan goal an chhuah a, Inrinni zan khan West Ham United lakah 1-0 in an chak lo. Hammers goal awmchhun hi minute 67-naah Michail Antonio-a'n a khung.

Spurs hian April thla chhung ringawt Premier League champion lai Manchester City ṭum thum lai an hmachhawn a, inkhelh banah Mauricio Pochettino chuan a naute chu an chauh tawng khawng thu a sawi.

Mikhual West Ham hian ball chang tlem zawk mah se an khel ṭha zawk a, chak an phu zawk. Goal khungtu Michail Antonio chu Spurs tlarhnung tan a hnawksak a, goal khung theih nana siam saktu Marko Arnautovic pawh first half a khelh ṭhat loh hnuin second half-ah a khel ṭha hle.

Spurs-in ṭum dang pha lo mah se goal chance erawh an nei tho a. Brighton laka goal awmchhun khungtu Spurs midfielder Christian Eriksen chuan goal khung theihna hun remchang a nei a, West Ham keeper Lucasz Fabianski-a'n a dan sak. Mualneitu tan Son Heung-min leh Lucas Moura ten chance ṭha an hlah bawk.

Tottenham boss Mauricio Pochettino chuan, "First half khel ṭha mah ila second half-ah erawh ball kan hloh nasa deuh a ni. Inelna dang kan hmachhawn tel avangin kan chau tawng khawng vang a tih theih bawk," tiin a sawi.

Spurs hian Thawhlehni zan hian Champions League-ah Ajax an hmachhawn dawn a, Premier League-ah Bournemouth leh Everton te an la hmachhawn dawn. Pochettino hote hian West Ham laka point an hmuh loh avangin Chelsea, Arsenal leh Manchester United te nen palina china awm tumin an inel chhunzawm ang.