Bayern Munich an lian tual tual

Bundesliga roreltu Bayern Munich-in season tawp lamah an zia an chhuah chho a, Inrinni zan khan Allianz Arena-ah Fortuna Dusseldorf 5-0 zetin an sawp. Hans-Dieter Flick hote hian Covid-19 vanga inkhelh chawlh chhunzawm a nih hnuah match li khel leh tawhin an la chak vek a, an elpui ber Borussia Dortmund an hneh bawk avangin an sang fal ta hle.

Dusseldorf defender Mathias Jorgensen-a'n minute 15-naah an lamah a tilut a, Bayern tan Benjamin Pavard leh Alphonso Davies te an khung belh a, defender pahnih goal khung karah hian Robert Lewandowski-a'n goal hnih a khung. Polish striker Lewy hian goal 29 a khung tawh a, amah hnaih bertu Timo Werner-a'n (24) goal ngain a pha lo.

Bayern Munich-in Covid-19 zawha an match hmasa berah Union Berlin an hneh ṭumin 2-0 chauhin an chak a, Eintracht Frankfurt leh Dusseldorf lakah goal nga ve ve an khung. An elpui ber Dortmund lakah goal khat khung mah se goal an chhuah lo a, Flick-a'n tlarhnung a siamrem chho a, match li an khelhah goal hnih chiah chhuah a, goal 13 an khung avangin Bayern elpha tur an awmin a lang tawh lo.

Bavarians hian Dusseldorf an ngam nghal a, minute 15-naah goal an sual chhuak. Serge Gnabry-a'n dinglam aṭanga ball lalutin Benjamin Pavard-a tan a pe let a, French defender-a'n goal zawnah pet lo mah se Jorgensen-a'n an lamah a ti lut. Thomas Muller-a goal khung tur Dusseldorf keeper Florian Kastenmeier-a'n dang thei mah se minute 29-naa Pavard-a tauh erawh a dang thei lo.

Bayern-in inkhel an thunun chhunzawm a, Manuel Neuer-a'n hna a nei meuh lo. Minute  43-naah Muller-a thawhrah sengin Lewandowski-a'n chiang zetin a khung a, Polish striker class zia a lang zui.

Minute 50-naah Gnabry ball pek chu Lewandowski-a'n a kheng a, a keeper kap karah a tak a lut. Dusseldorf tan thawhchhuah ngaihna a awm tawh lo. Wing back tlan chak leh che rang Alphonso Davies-a'n Fortuna Dusseldorf tlarhnung pathum karah ball pal chhuakin Bayern goal ngana a khung a, 5-0 in inkhel a tawp. 

Hans-Dieter Flick-a'n Fortuna Dusseldorf an hmachhawn hmain team a siksawi tam loh tur thu a sawi lawk a, Jerome Boateng chiah a thlak. Bayern boss hian match hnuhnung pathumah defender dang pathum a khel tluan tir vek a, Boateng chiah a thlak.

German defender Boateng hi Dusseldorf nen a awltir a, a aiah Lucas Hernandez a luhtir. French defender hi Bayern player manto ber record chelhtu a ni a, nipui transfer khan euro maktaduai 80-in a lalut. Left back-ah Davies a khelh ṭhat avangin Hernandez-a tan khelhna hmun a harsat rin a ni a, amaherawhchu defence laiah a awm ta thung.

Hernandez hian first half chiah khel mah se ball a chan apiangin a inrintawkna a lang a, an khingpuiten pressure an pekin a buai lo a, ball vawi thum an inchuhah a chak zawkah a ṭang vek. Amaherawhchu inhliam vangin French defender hi lakchhuah a ni a, Bavarian ṭantute chuan a inhliam nat loh an beisei ang.

Kum 31 mi Robert Lewandowski-a'n tun season inelna hrang hrangah goal 43 a khung tawh a, 2016–17 season-a a khung tam ber ṭum nen a inang chiah. Polish striker hian Bundesliga bikah goal 29 a khung tawh a, 2015–16 leh 2016–17 season-a a khung zat goal 30 erawh a pha lo.

Bayern manager Hans-Dieter Flick chuan, "Press Conference-ah Lewandowski-a'n Dusseldorf lakah goal a la khung loh tih an sawi khan mak ka ti. A bulah thlak danglam thuai turin ka hrilh a, goal hnih a rawn khung. Ka lawmpui hle," tiin a sawi.