PFA Players' Player of the Year Virgil van Dijk

Kum 20 mi lek a nih laia natna khuma thi mai tura ngaih, thurochhiah ziak tur hiala hrilh ni tawh Virgil van Dijk chu Pathianni zan khan ropui takin a ding chhuak a, English football-a player thiam berah puan a ni.

Pathianni zan, keini sanaa zing lam dar 2:00 velah khan Professional Footballers' Association Player of the Year chawimawina chu Van Dijk hnenah pek a ni a, a player pui ten Premier League-ah a aia ṭha player an hre lo.

Liverpool defender hian he chawi-mawina dawng tur hian Manchester City trio Raheem Sterling, Bernardo Silva leh Sergio Aguero, Liverpool tana a khelhpui Sadio Mane leh Chelsea thiampuipa Eden Hazard-te a khum.

Sterling-a'n chawimawina sang ber dawng ta lo mah se Young Player of the Year-ah erawh thlan a ni tho a, Arsenal forward Vivianne Miedema chu hmeichhe lamah Player of the Year-a thlan a ni bawk.

Ava hlu em
Dutch club Groningen-a a career ṭantir lama striker atana an chhawr ṭhin VVD hi tunah chuan khawvela defender ṭha ber pawl a ni tawh a, Reds tana a sulhnu avangin he chawimawina dawn hi a phu hle.

Kum 27 mi defender chuan, "Kartina ka hmachhawn ṭhin ka player puiten player ṭha berah min thlang a, ka tan chuan hei aia chawimawina ropui zawk a awm chuang lo," a ti a, John Terry (2004-05) hnua defender he chawimawina dawng leh thei hmasa ber a ni.

Van Dijk hi tun season-a league match 36-an khelh tawhah a inlan vek a, match 18 clean sheets a nei a, defender nichung siin yellow card vawi khat chauh a hmu a, vawi khatmah an khingpui player-in an la bum lo .

Liverpool-in Premier League nomawi chawi an beiseina kawnga player pawimawh Van Dijk chuan, "Player of the Year ka ni thei hi hlu ka ti a, uanpui tham a ni," a ti - season hmasa khan Reds forward Mohamed Salah chuan he chawimawina hi a dawng.

Sterling a nil lo
Chawimawina semchhuah a nih hma khan Van Dijk hi Sterling nen Player of the Year chawimawina dawng tura in um ber tur rin an ni a, Sterling-a'n VVD phak ta lo mah se Young Player of the Year erawh a ni ta tho.

Kum 24 mi forward hian he chawimawina dawng tur hian Silva, Manchester United forward Marcus Rashford, Liverpool right back Trent Alexander-Arnold, Bournemouth midfielder David Brooks leh West Ham midfielder Declan Rice te a khum.

Sterling hian tun season-ah City tan league match 31 khelin goal 17 a khung a, assist vawi 10 a nei bawk - season hmasa khan City tana a khelhpui Leroy Sane chuan Young Player of the Year chawimawina hi a dawng.

Liverpool forward hlui hian kar hmasa lawk khan vun rawng inthliarna a do avangin BT Sport Industry Awards-ah chawimawina a lo dawng tawh a, "Steven Gerrard te ang player ropui bula seilian ka ni a, player leh mihring a nihna ang zahve tal nih tumin ka bei ṭhin a ni," tiin a lo sawi tawh.

Hmeichhe chawimawina
Miedema-i'n hmeichhe player ṭha ber chawimawina a dawng a, VVD ang thoa Netherlands mi niin ram khat player-in PFA Player of the Year awards an dawn kawp hmasak ber a ni.

Arsenal forward hi Women's Super League-ah top scorer niin match 19-ah goal 22 a khung a, assist vawi 10 a nei. Young Player of the Year atan City forward Georgia Stanway thlan a ni.

Special Achievement award chu Steph Houghton hnenah hlan a ni bawk. City leh England hmeichhe team captain hi nikum khan a pasal Liverpool, Bradford leh Bolton defender hlui Stephen Darby chuan motor neurone disease (nerve natna) a neih avangin inkhelh a chawlhsan.

Houghton hian a pasal damna tur a nih chuan World Cup khelh loh mai a hnial loh thu a sawi hial a ni.