PSG-ah Icardi a nghet

Paris Saint-Germain chuan loan hmanga an hawh lai Inter Milan striker Mauro Icardi chu a nghetin an kawl zui dawn. Argentine striker manah hian pound maktaduai 45 a ni dawn a, pound maktaduai nga bawr chu a khelh ṭhat dana zira pek tur a ni ang.

Kum 27 mi Icardi hian 2013 khan San Siro a pan, Serie A hmatawng hriam leh hlauhawm ber zinga mi a ni chho a, 2015 khan league goal 22 khungin Luca Toni nen top scorer dinhmun an chelh.

Inter Milan captain nihna a chelh chho thei hial a, mahse club nen contract chungchangah inberem thei loin kawhmawh a bawl zui a, captain a nihna hi hlihsak a ngai hial - a hnuah khel leh mah se tun hma angin a tlatlum thei tawh lo.

Nipui bazar hmasa khan French champion hi loan hmangin a zawm, Paris club tan hian inelna hrang hrangah match 31 a khelh aṭangin goal 20 a khungsak - season tharah chuan Edinson Cavani hmun ruak a luah tura ngaih a ni.

Kar hmasa khan Inter sporting director Piero Ausilio chuan an player hi Paris khawpuia cham a duh thu leh inbiakna an neih mek thu a sawi a, a hnu lawkah inremna an neih thu hi media lamin an tarlang.

Italian club Inter Milan hian Manchester United aṭangin Alexis Sanchez chu loan hmangin an hawh mek ve thung a, tun season chhung chhawr tluan dawn mah se a ngheta lak tumna erawh an nei rih lem lo.