Bayern Munich chelhtu Nuremberg

Pathianni zan khan Bun­desliga nomawi chawi tum Ba­yern Munich leh Germany football inelna sang ber khelh chhunzawm tum mek Nurem­berg te an inkhel a, 1-1 a inhneh­tawkin point khat ve ve an insem.

Inrinni zanah Borussia Dortmund an tlawm a, league nomawi an beiseina thamral tura ngaih a ni hman. Mahse, Bayern an chak zawh loh takah chuan Dortmund pawhin beiseina an la nei zui zel. Bundesliga table hmahruaitu Bayern hi point hnih chauhin an sang mek, match khelh hmabak pathum an la nei.

Point khat
Max-Morlock-Stadion-a Bavarian derby inkhelah inham­tan tuma bei mek Nuremberg chu a chefuh hmasa zawkah an ṭang, minute 48-naah Matheus Pereira chuan yard 18-a hla aṭangin goal hmahruai a khung.

Table-a 17-na nilai hian an goal neih humhim an tum nasa a, tlarhnungah an inhnawhkhawm nasa hle. Mahse, Bayern lam­in an nawr na a, Kingsley Coman-a corner pet chu Serge Gnabry-a'n keeper Christian Mathenia dan theih lohin a khung.

Injury time-ah Bayern winger Alphonso Davies-a'n Georg Margreitter a tihtluk avangin penalty a chawi a, a pet tura rawn ding chhuak Tim Leibold chuan goal ban tih perin a hlah a, goal dang lut turin hun a awm tawh lo.

Rodriguez inhliam
Second half tir lama lut Bayern play­maker James Rodriguez chu hliam vangin minute 72-naah thlak a ni a, James hian dressing room a pan nghal. Thlak a nih danah Bayern sporting director Hasan Salihamidzic a inrawlh nia sawi a awm!

Bayern manager Niko Kovac chuan, "James kha a chawn a hliam a, a na tih kan hriat hnu lawkah Thiago Alcantara rawn kalin thlak a ngaih thu a rawn sawi," a ti.

Sporting director Hasan chung­chang sawi zuiin, "Sta­dium chhung boruak a sangin thawm a ring em em a, ani khan nal taka Spanish ṭawng a hman theih avangin Alcantara thu sawi chungchang a nihna tak kan zawt mai zawk a ni," tiin a sawi.

Tun hnai season ruk chhung chu Bayern hian league nomawi an chawi vek a, a vawi sarih nan champion an tum. An khingpui Nuremberg erawh table mawng lama talbuai lai niin relegation zone aṭanga him china awm Stuttgart an phak lohna chu point nga zet a la ni.