Man City chakna Aguero vanneih goal

Premier League champion turin vanneih a ṭul a nih chuan Manchester City-in vanneihna an nei a, Pathianni zan khan Turf Moor-ah Burnley chu 1-0 lekin an hneh. Citizen goal awmchhun Sergio Aguero khungin goalline a pelhna zat chu '29.51mm' chauh a ni a, goalline technology hmanga pawm a ni.

Pep Guardiola hote hian hnehna an chan avangin match hnih khelh hmabakah Liverpool aiin point khatin an hmu sang zawk. City hian Leicester City leh Brighton & Hove Albion te an la hmachhawn dawn a, Premier League an khelh zawhah chauh FA Cup final an khel dawn. An elpui Liverpool erawhin Newcastle United leh Wolverhampton Wanderers te an la hmachhawn dawn a, hemi inkarah hian Barcelona nen Champions League semifinal an la khel dawn bawk.

Clarets an khawng
Burnley manager Sean Dyche-a'n a naupan laia Liverpool ṭantu a nih ṭhin thu a sawichhuah avangin Reds fan-te'n Clarets chungah beiseina an neih san phah a, inkhelh hma hauhin boruak a nun phah hle.

Beisei lawk ang ngeiin point khata lawm Burnley-in goal venhim chu an thupui ber a ni a, Man City meuh tan pawh sut tlang an harsa. Clarets hian City keeper Ederson tan harsatna siam miah lo mah se Dyche-a naute dem theih an ni lo a, an hnaah an chian em avangin ngaihsan an hlawh letling zawk.

Goal khat chu
Manchester City-in an beisei goal an hmu lawk lo a, chance ṭha insiam pawh an harsat. Vanduai thei dinhmuna an din laiin minute 64-naah Sergio Aguero pet chu Burnley player Matthew Lowton chuan pet chhuak mah se goalline technology hmangin goal-ah pawm a ni a, '29.51mm' chauhin goalline a pel.

Goalline technology hman a nih hma khan 2010 World Cup-a Frank Lampard-a ball pet chuan feet khat dawnin Germany goal line pel mah se pawm a ni lo. Tun ṭuma goalline a pelhna hi 'kutzungpui' tiat lek a ni a, GLT hman ni lo se pawm loh theih tak tur a ni.

Hei hian champion nomawi inchuh mek Manchester City leh Liverpool inkar zim zia a pholang a, match khat chetsuala inlehthal thei reng an ni. Season dangah chuan tun season-a an point hmuh zat ang hmu hi chu an la champion ziah a, tun ṭumah erawh vanduai zawk an awm a ṭul ang.

Legend Aguero
Manchester City manager Pep Guardiola chuan, "Technology chu hmang lo ila goal-ah pawm a ni kher lo ang. Chutiang bawkin penalty ni awm tak pawh pek a ni lo. Hei vang tak hian tunlai thiamna hman zel hi ka duh," tiin GLT an hmang chu lawmawm a ti a, VAR hman ni se penalty an hmuh a rin thu a sawi lang bawk.

Goal khungtu Aguero fak zuiin Guardiola chuan, "Sergio hi legend a ni. Goal pawimawh khung hi a tih ṭhin dan a ni," tiin Premier League-a Man City an champion hmasak ber ṭuma goal pawimawh khungtu chuan a hna ngai a la thawh reng thu a sawi.

Spanish manager chuan, "Engtik hunah emaw point 100 hmu tling chu an awm leh ang. Amaherawhchu season hnihnaah 92, 95, 98 hmu tling chu an awm tawh kher lo ang. Season hnih chhungin point 192 kan hmu a; United, Arsenal leh Tottenham te aia point 20 chuanga kan hmu tam thei pawh hi a ropui a ni," tiin a sawi.

City an hlauthawng
Burnley manager Sean Dyche chuan, "Mit ngeiin Pep Guardiola-a'n a player-te hun khawhral tura mual sir lama ball kalpui tura a tih kha ka hmu a, kan tan chuan a lawmawm dangdai hle," tiin Man City manager an ti hlauthawng pha chu a inchhuang hle.

Manchester City hian Arsenal sawptu Leicester City chu May 6, Thawhṭanni zanah an hmachhawn dawn a, Liverpool aiin an khel hnuhnung zawk dawn. Reds erawhin Nilaini zanah Barcelona an tlawh ang a, Inrinni zan dar 12:15-ah Newcastle United chu St James' Park-ah an tlawh lehnghal ang.