Rengkhawpui-in semifinal an lut

MFA Cup vawi 19-na semifinal lut tur a hriat kim a, Vairengte club FC Rengkhawpui chuan semifinal lut turin Siahatla FC 5-1 in an sawp. Inkhel dangah semifinal lut chiang tawh Aizawl FC Junior-in FC Serchhip Kawnpui chu 4-0 in an sawp ve bawk.

Semifinal hi May 1, Nilaini hian CYLA Playground, Lawngtlaiah khelh tur a ni a, Lunglei club Zotlang FC chuan Kolasib District aiawh FC Rengkhawpui an hmachhawn ang a, Aizawl FC Junior leh Champhai club Kahrawt FC ten final khel tur an zawng bawk ang.

Nimin inkhel hmasa zawkah match hmasa pahniha chak lo FC Rengkhawpui-in harhtharna changin Siahatla FC chu 5-1 in an sawp a, inkhelh zawhah goal difference hmangin pahnihna dinhmun an luah nghal. Amaherawhchu Vairengte club hi Aizawl FC Junior kutah an innghat a, FC Serchhip Kawnpui-in point an hmuh chuan an tla dawn.

Rengkhawpui duhthu-samin inkhel tawp ber result a thleng a, Aizawl FC Junior-in hnehna an chan zarah semifinal an lut. FC Serchhip Kawnpui erawhin an match hmasa bera Siahatla FC an hneh loh an tuar thung.