Barcelona Open champion Thiem

Dominic Thiem chuan Daniil Medvedev hnehin Barcelona Open nomawi a chawi. World number 5 Thiem hi thla hmasa khan Indian Wells-ah a champion tawh bawk a, tun season chhunga a title pahnihna a ni.

Pathianni zan inkhelah kum 25 mi Thiem-a'n set hmasa zawkah a service hloh mah se, game hnuhnung 13 zinga 12 a lak theih avangin 6-4, 6-0 in hnehna a chang - darkar khat leh minute 13 chhungin hnehna a chang.

Austrian tlangval Thiem hian semifinal-ah vawi 11 champion tawh Rafael Nadal a hneh bawk a, season dang ang bawkin clay court a hmang ṭha leh dawn niin a lang. May 26 aṭanga khelh tur French Open chu atan fiahna lian ber a ni dawn.

Thiem chuan, "He hmuna champion tawhte hi player ropui tak tak an ni a, an bula ka hming a chuang ve tawh tur hi ka lawm hle. Final inkhel bikah khan a tir lamah buai mah ila beidawng loa ka beih vangin a tawpah ka hlawhtling," a ti. Set hmasa berah 3-0 zeta a hnufual hnuah a tho chhuak a ni.

May 3 aṭanga khelh tur Madrid Open-ah Thiem hi inlan leh nghal a tum a, tennis a khelh hun chhunga nomawi a chawi 13 zinga pakua chu clay court-ah a nih avangin Madrid pawh hi a tan hmun ṭha a ni - Roland Garros inbuatsaihna ṭha tak a ni nghal bawk ang.