An mualah Chhinga Veng an chak lo

2nd Division League final round chu nimin khan khelh ṭan a ni a, Chhinga Veng FC-in RG Stadium, Mualpuiah Trau FC 3-1 in an hneh lo. Inkhel dangah final round tling tura rinkai Ozone FC chuan Lonestar Kashmir 3-0 in an sawp bawk.

Chhinga Vengin hliam vangin Godwin Quashiga bul an ṭantir ngam lo a, Ghanaian defensive midfielder awm loh an tuar a, an chak loh chhan tak erawh tlarhnung chetsual vang a ni. First half tawp hma hretin Chhingcows defender PC Laldinpuia ball hloh vangin Trau FC-in an vaw let a, referee Pratik Mondal-a'n penalty pek lohna tur niawm takah spot a kawh avangin Princewill Emeka-a'n penalty aṭangin hmahruaina a khung.

Second half-ah Godwin Quashiga rawn lutin Mizo club-in nawr chhunzawm mah se counter attack hmangin Joseph Olaleye-a'n Trau FC goal hnihna a khung. Chhingcows tan Godwin-a'n ṭha takin a tauh lut a, minute 10 a la awm avangin Mizo club-in point hmuh an la inbeisei. Amaherawhchu Chhinga Vengin corner kick an pet fuh loh avangin Trau FC-in an nawr let a, substitute Yami Longvah-a'n a luh aṭanga minute khat pawh tling loah a khung nghal a, Manipur club 3-1 in an chak.