Brendan Rodgers a inpuang

Leicester City manager Brendan Rodgers chuan March-a coronavirus a kai tih an hriat khan chakna reng reng a neih loh thu a sawi a, "Kal pawh ka kal hleithei lo a, Africa tlang sang tak Mount Kilimanjaro-a lawn ang mai a ni," a ti!

Premier League manager zingah chuan Arsenal boss Mikel Arteta chu Covid-19 kai hmasa ber a ni a, a hnuah hian Rodgers hian a kai thu a sawi ve leh - tunah erawh a dam ṭha tawh. 

Liverpool boss hlui chuan, "March 14 khan Watford hmachhawn tur kan ni a, mahse kar khat chawlh kan nei. Chumi hnu kar a liam leh a, buaina ka nei ṭan ta a ni. Kar thum zet chu thil tuina ka hre lo a, a rim ka hre thei lo bawk. 

"Chakna ka nei lo a, a hnu kar khatah ka nupui pawh chutiang bawk chuan a awm. Kan pahnihin test kan hmachhawn a, hri kan kai thu a chiang ta a ni," a ti. 

Rodgers chuan sawi zawmin, "Africa tlang sang ber Kilimanjaro ka lawn lai kha minti hre chhuak a ni. Ka lawn san poh leh boruak hip a harsa a, thawk a harsa takzet," a ti. 

Kum 47 mi coach hian kum 2011 khan charity pualin Kilimanjaro tlang hi a lawn a, Covid-19 kai leh he tlang lawn hi a khaikhin a ni. Rodgers chuan, "Fit leh hrisel taka awm lo hlutzia min hriattir a ni," tiin a hun tawn chungchang hi a sawi bawk.