PSG leh Bayern danglamna Mbappe

Thawhlehni zan khan Allianz Arena-ah 2020 Champions League final rematch neih a ni a, Paris Saint-Germain-in Kylian Mbappe goal hnih hmangin Bayern Munich lakah 3-2 in phuba an la.

Champion lai Bavarians-in inkhel thunun mah se Robert Lewandowski awm loh a lang. PSG-in Mbappe leh Marquinhos hmangin 2-0 in hma an hruai a, Eric Maxim Choupo-Moting leh Thomas Muller te goal hmangin Bayern-in sut mah se Mbappe-a'n chakna goal a khung.

A thiam nge nge
Bayern Munich-in nung takin bul an ṭan a, Lucas Hernandez-a'n PSG keeper Keylor Navas tan hna a siam nghal a, Choupo-Moting-a'n crossbar a tauh per nghal a, goal erawh a lut lo.

PSG-in tlarhmaah Neymar leh Mbappe an nei a, Bavarians goal bawh na mah se an talbuai duh lo. Minute thumna lekah Neymar-a ball pass chu Mbappe-a'n a pet goal. PSG-in player ṭha bik lei nana sum an hman tam rah an seng a, Bayern keeper Manuel Neuer a chesual tel ve bawk.

Mikhual team tan minute 12-naah Julian Draxler-a'n goal a khung berah a inngai a, amaherawhchu ball petu Mbappe a offside vangin pawm a ni lo. PSG erawhin goal an khung zui tho a, minute 28-naah Neymar-a fing takin Marquinhos a pe a, French club captain hian chiang takin a khung.

Champion lai an ni tlat
Bayern Munich-in goal hnih an chhuah hnuah pawh tha an thlah duh lo a, an goal bawh nat zarah goal an sual chhuak. Minute 37-naah Benjamin Pavard-a cross chu Choupo-Moting-a'n a club hlui lamah a tauh lut a, German club-in beiseina thar an neih phah.

Bavarians keeper Neuer-a'n a tihsual hliah khuh nan Neymar leh Mbappe te goal khung tur a rawn dang zui a, minute 60-naah mualneituin Thomas Muller hmangin siphurh an sut. Muller hian amah duh lotu Germany national team coach Joachim Low hmaah Kimmich-a freekick pet a tauh lut.

A hming chu Mbappe
Minute 30 khelh tur a la awm avangin Bayern an chak theih a rinawm a, amaherawhchu PSG-in Mbappe an kawl. Minute 68-naah Mbappe hian box chhunga inringtawk takin Jerome Boateng a hmachhawn a, German defender kap karah pet lutin goal pawimawh a khung.

Mbappe hian season liam ta khan goal 30 a khung a, Covid-19 vanga Ligue 1 an tihtawp hma vangin a khung tlem zawk. Tun season-ah erawh inelna hrang hrangah goal 32 a khung leh der tawh a, season khata a khung tam ber goal 39 a khum theih mai a rinawm. Champions League-ah pawh Mbappe hian tun season-ah goal riat a khung tawh a, goal 10 khungtu Erling Haaland chiah tluk lo a nei a ni.

Lewy tel lohna
Bayern Munich tlarhnung pawp vangin hrem an ni a, tlarhma lamah Robert Lewandowski tel loh a hriat bawk. Bavarians hian hnehna chang zo lo mah se ball possession 64% an nei a, goal attempt vawi 31 zet an nei a, an vanduai tih loh rual a ni lo.

Bayern tlarhmaten an chance neih an hmang ṭangkai tawk lo a, mual sira awm Kingsley Coman leh Leroy Sane te dah ṭhain an awm. Muller leh Choupo-Moting te che ṭha viau mah se chance ṭha an hlah tho a, Lewy hmunruak hnawhkhattu an awm lo. Player thawkrim Muller hian goal khata an hnufual laiin goal chance ṭha bik a hlah a, hun tawp lamah siphurh sut theihna tura a hun ṭha neih a hmang ṭangkai thei lo.

Choupo-Moting pawhin PSG tlarhnung rum ṭhaih mah se goal khat bak a khung thei lo a, Mauricio Pochettino hote an ṭangtluan hram. Bayern tlarhmaah Lewy awm loh a hriat a, hrileng vanga Serge Gnabry awm lohin German club harsatna a belhchhah bawk. Chutihrualin PSG-in Bayern tlarhnung ṭha tawk lo hrem turin Neymar leh Mbappe an kawl miau a, French champion-in hnehna an chan theih phah.

Flick a chesual em?
Bayern Munich-in minute thumna lekah goal an a chhuah a, treble champion puitu Hansi Flick-a game plan-ah nghawng lian tak a nei ang tih a chiang. Chutihrualin bench-a Alphonso Davies a dah chu a tihsual hmasa berah a ngaih theih.

Pahnihnaah chuan Flick-a'n Leon Goretzka a thlak lawk lo. German midfielder Goretzka hian harsatna a nei a, Joshua Kimmich pawhin thlak turin a rawn hriattir a, thutlukna an siam lawk loh avangin goal hnihna an chhuahah a ngaih theih. Minute 33-naah Goretzka hi Davies-a'n a rawn thlak ta tho a, a pawi tur ang a pawi hman.

Coman leh Sane te che ṭha lo chunga an khelh rei avangin Flick-a'n dem a hlawh phah a, Jamal Musiala lut ta se danglamna a thlen theih beiseina a awm. Amaherawhchu Bavarians goal bawh a na a, Keylor Navas chet ṭhat ṭum an tawn avangin an vanduai tia sawi theih a ni.

Bayern-in an mualah goal thum an chhuah avangin Paris-ah goal hniha an chak a nih loh chuan goal thum tal an khung tling a ngai dawn a, second leg a hmuhnawm dawn.

Inkhelh harsa tak a ni. Tun dinhmuna Europe-a team ṭha ber lakah ṭha takin kan khel a, mahse a chanve chauh kan la zo tih hriat a ṭha. Paris-ah team angin inrintawkna nen team anga kan khelh leh a ṭul a ni. - Kylian Mbappe, PSG

Kan result-ah ka lawm. Hun harsaah ka player-ten an theihna zawng zawngin an khel a, an thawhrah a ni. Tun ṭuma kan khelh ang hian kan khelh nawn leh a ṭul ang. - Mauricio Pochettino, PSG manager

Kan khingpuiten an chance neih tlemte aṭangin vawi thum an khung a, amaherawhchu ka player-te an khel ṭha. Kan chance neih dan thlir ila result dang deuh nei thei tur kan ni. - Hansi Flick, Bayern manager